کراچی: شہر قائد میں سندھ رینجرز اور پولیس کی مشترکہ کارروائی میں 200 سے زائد اسٹریٹ کرائم کی وارداتوں میں ملوث ملزم امیر خان گرفتار کر لیا گیا۔
تفصیلات کے مطابق کراچی کے علاقے اورنگی ٹاؤن میں پولیس اور رینجرز نے خفیہ اطلاع پر مشترکہ کارروائی کر کے قتل، اقدام قتل، اسٹریٹ کرائم اور دیگر جرائم میں ملوث ملزم امیر خان کو گرفتار کر لیا۔
ترجمان سندھ رینجرز کے مطابق ملزم نے مئی 2022 میں اپنے ساتھیوں کے ہمراہ اورنگی ٹاؤن میں طاہر نامی شخص کو فائرنگ کر کے قتل کیا تھا۔
ملزم نے دسمبر 2022 میں اورنگی ٹاؤن مومن آباد میں ڈکیتی مزاحمت پر عثمان نامی شخص کو فائرنگ کر کے قتل کا اعتراف کیا، واقعے کی سی سی ٹی وی فوٹیج سوشل میڈیا پر وائرل ہوئی تھی، فوٹیج میں ملزم کو پہچانا جا سکتا ہے۔
ملزم نے ڈکیتی اور اسٹریٹ کرائم کی 200 سے زائد وارداتوں میں 400 سے زائد موبائل فون اور 10 لاکھ روپے سے زائد نقدی چھینی۔
ملزم کے دیگر ساتھیوں کی گرفتاری کے لیے چھاپے مارے جا رہے ہیں، گرفتار ملزم کو مزید قانونی کارروائی کے لیے پولیس کے حوالے کر دیا گیا ہے۔
