کراچی کے علاقے لانڈھی مانسہرہ کالونی پر غیر ملکیوں پر خودکش حملے کی تحقیقات میں اہم پیشرفت ہوئی ہے۔
اے آر وائی نیوز کے مطابق کراچی کے علاقے لانڈھی مانسہرہ کالونی میں خودکش حملے کی تحقیقات کے سلسلے میں پولیس نے محمودآباد، اورنگی ٹاؤن، سرجانی ٹاؤن میں کارروائیاں کی ہیں۔
پولیس کا بتانا ہے کہ واردات میں استعمال ہونے والی موٹرسائیکل جس شخص کے نام رجسٹرڈ ہے اسے حراست میں لے لیا گیا ہے۔
پولیس کے مطابق شہری کا کہنا ہے کہ اس نے کبھی موٹر سائیکل ہی نہیں خریدی، مذکورہ شہری کا شناختی کارڈ جعل سازی سے استعمال کیا گیا ہے۔
اس سے قبل تحقیقاتی ٹیم کا بتانا تھا کہ حملہ آور سہیل نے 2017 کے بعد اوورسیز پاکستانی کا شناختی کارڈ بنوایا تھا اور اپنی رہائش اومان لکھوائی ہوئی تھی۔
تحقیقاتی حکام نے پنجگور میں سہیل اوراس کے رشتے داروں کے گھر چھاپہ مار کارروائی کی تھی اور اس دوران خودکش بمبار کے کچھ ساتھیوں کو گرفتار کیا گیا۔
تحقیقاتی حکام کا کہنا تھا کہ 2021 کے بعد سے سہیل مختلف سرگرمیوں میں ملوث رہا ہے۔
واضح رہے آج صبح کراچی کے علاقے لانڈھی مانسہرہ کالونی میں دہشت گردوں نےغیرملکی شہریوں کو لے جانے والی گاڑی پر حملہ کیا تھا۔
پولیس نے بتایا تھا کہ حملہ ناکام بناتے ہوئے دو دہشت گردوں کوہلاک کردیاگیا ہے جبکہ گاڑی میں موجودتمام غیر ملکی مہمان محفوظ ہیں۔
حملہ کرنے والے ایک دہشت گرد نے خود کودھماکےسے اڑایا، دوسرا دہشت گرد پولیس سے مقابلے میں مارا گیا جبکہ دہشت ردوں کی فائرنگ سےدوسیکیورٹی گارڑاورایک راہ گیرزخمی ہوا۔
پولیس کے مطابق ہلاک دہشت گردوں کے پاس سے بیگ ملا ہے، جس میں دستی بم موجود ہیں، دھماکےکی زد میں قریب موجود ایک موٹر سائیکل اورپک اپ آئی تھی۔
