کراچی کی سڑکیں شہریوں کے لیے موت کا جال ثابت ہورہی ہیں رواں سال کے ابتدائی 11 ماہ کے دوران مجموعی طور پر روڈ حادثات میں 640 سے زائد شہری لقمہ اجل بنے۔
کراچی میں ٹریفک حادثات اور ان میں اموات بد قسمتی سے معمول بن گئی ہیں، کہیں سڑکیں خراب، کہیں ٹریفک پولیس غائب، کہیں جلد بازی، کہیں رانگ وے جانے کی روش اور کہیں شہریوں کی ٹریفک قوانین کی سنگین خلاف ورزیاں اب تک کتنی جانیں جا چکی ہیں۔
رواں سال کراچی میں ایک جانب اسٹریٹ کرائم کی وارداتوں کے دوران درجنوں شہری موت کی آغوش میں چلے گئے وہیں ٹریفک حادثات نے کئی شہریوں کی زندگی چھین لی، شہر قائد کی سڑکوں پر تیز رفتاری اور غفلت کے باعث ٹریفک حادثات بڑھ گئے ہیں، بے قابو ڈمپر، ٹرالر اور ٹرک شہریوں میں موت بانٹنے لگے۔
اے آر وائی کی نیوز کے رپورٹ کے مطابق کراچی میں رواں سال اب تک ٹریفک حادثات کے نتیجہ میں 640 سے زائد افراد جاں بحق ہوچکے ہیں اس کے علاوہ زخمیوں کی تعداد 10 ہزار 120 سے زائد بتائی گئی ہے۔
ایدھی حکام کی رپورٹ کے مطابق حادثات کے تقریباً 55 فیصد واقعات ہیوی ٹریفک کے باعث پیش آئے ہیں، جبکہ بس اور دیگرحادثات میں بھی شہری زندگی کی بازی ہارگئے ہیں۔
