کراچی : جامعہ کراچی دھماکے میں جاں بحق ہونے والے چینی باشندوں کی آخری رسومات کی ادائیگی کیلئے لاشیں گولیمار شمشان گھاٹ پہنچادی گئیں۔
تفصیلات کے مطابق کراچی یونیورسٹی خودکش دھماکے میں جاں بحق ہونے والے چینی باشندوں چینی باشندوں کی لاشوں کو تابوت میں رکھ کر پروٹوکول کے ساتھ روانہ کردیا گیا۔
اس موقع پر فلاحی ادارے کے دفتر میں بی ڈی ایس نے چیکنگ کی اور سردخانے کے اطراف سیکیورٹی کے سخت انتظامات کئے گیے۔
جس کے بعد آخری رسومات کیلئے چینی باشندوں کی لاشیں گولیمارشمشان گھاٹ پہنچادی گئیں ، حکومت پاکستان کی جانب سے آخری رسومات کا بندوبست کیا گیا ہے۔
گولیمارشمشان گھاٹ پر آخری رسومات کے لئے تیاریاں مکمل کی جارہی ہیں، وزیر اعلیٰ سندھ ،ڈی جی رینجرز ،چیف سیکریٹری سندھ ، چینی قونصل جنرل اور دیگر اعلیٰ حکام آخری رسومات میں شرکت کریں گے۔
آئی جی سندھ اور ڈی سی ساؤتھ بھی شمشان گھاٹ پہنچ گئے ہیں۔
یاد رہے جامعہ کراچی کے اندر ایک خاتون نے خود کش دھماکے کے ذریعے چینی باشندوں کی وین کو نشانہ بنایا تھا ، جس کے نتیجے میں 3 چینی باشندوں سمیت 4 افراد ہلاک اور 3 زخمی ہوگئے تھے۔
ترجمان جامعہ کراچی کے مطابق دھماکے میں کنفیوشس انسٹیٹیوٹ کے ڈائریکٹر ہوانگ گیوپنگ سمیت خواتین اساتذہ ڈنگ میوپنگ اور چن سا ہلاک ہوئی جب کہ ایک پاکستانی ڈرائیور خالد بھی مرنے والوں میں شامل تھے۔
