کراچی : شہر قائد میں سردی کی لہر جاری ہے، محکمہ موسمیات نے شہریوں کو سردی کی نئی لہر سے متعلق خبردار کردیا، جس سے سردی کی شدت میں اضافے کا امکان ہے۔
تفصیلات کے مطابق ملک بھر میں جہاں ٹھنڈ پڑ رہی ہیں وہیں کراچی میں بھی سرد ہواؤں نے سردی کی شدت میں اضافہ کردیا ہے۔
محکمہ موسمیات نے شہریوں کو خبردار کیا ہے کہ جمعہ سے شہر میں سرد ہواؤں کا سلسلہ داخل ہوگا، جس سے اس ہفتہ سردی کی شدت مزیدبڑھنےکےامکانات ہیں۔
موسم کا حال بتانے والوں کا کہنا تھا کہ 19 جنوری تک رات کے درجہ حرارت 10 سے 12ڈگری تک رہنے اور 17جنوری کو تیز ہوائیں چلنے کا امکان ہے۔
کراچی کاموجودہ درجہ حرارت12ڈگری سینٹی گریڈ جبکہ زیادہ سےزیادہ درجہ حرارت 26ڈگری سینٹی گریڈتک جانےکاامکان ہے تاہم ہوامیں نمی کا تناسب 70 فیصد ہے۔
محکمہ موسمیات نے بلوچستان میں چند مقامات پر ہلکی بارش اور برف باری کی پیشگوئی کی ہے، کوئٹہ میں درجہ حرارت منفی دو ڈگری تک پہنچ گیا ہے جبکہ قلات میں منفی تین اور زیارت منفی تین ڈگری پر آگیا۔
بالائی علاقوں میں برفیلی ہوائیں شہریوں کا خون جمارہی ہیں اور پارہ نقطہ انجماد سے کئی ڈگری نیچے چلا گیا ہے۔ شدید سرد موسم نےاستورااور اسکردو کا پارہ منفی دس تک پہنچا دیا ہے، گلگت اورکالام میں منفی سات،ہنزہ میں منفی چھ اورچترال میں منفی چارریکارڈ کیا گیا۔
