ممبئی : بھارتی ریاست مہاراشٹر کے بڑے شہر ممبئی میں کورونا وائرس نے اپنے پنجے گاڑنا شروع کردیے، فلم ڈائریکٹر کرن جوہر کی سالگرہ تقریب میں درجنوں افراد کوویڈ سے متاثرہ پائے گئے۔
تفصیلات کے مطابق ممبئی میں ایک بار پھر کورونا وائرس کے پھیلنے کی خبریں تواتر سے آرہی ہیں ۔پورے مہاراشٹر میں کورونا کیسز میں اضافہ دیکھا جا رہا ہے۔
اس حوالے سے بھارتی میڈیا کا کہنا ہے کہ معروف فلم ڈائریکٹر کرن جوہر کی 50 ویں سالگرہ کی تقریب میں شرکت کرنے والے تقریباً 50 سے 55 مہمان کوویڈ-19 سے متاثر پائے گئے ہیں۔
تقریب کا اہتمام ممبئی کے اندھیری ویسٹ میں واقع یش راج فلمز اسٹوڈیو میں کیا گیا تھا جس میں ریتھک روشن، شاہ رخ خان، کترینہ کیف، کیارا ایڈوانی، جانہوی کپور، ملائکہ اروڑہ، کرینہ کپورخان اور دیگر موجود تھیں۔
بھارتی میڈیا کے مطابق تقریب میں موجود دیگر افراد میں بھی اس کی علامات محسوس ہوئی ہیں لیکن بہت سے لوگ اسے ظاہر نہیں کر رہے ہیں۔
اس کے علاوہ اداکار کارتک آرین بھی کورونا وائرس سے متاثر پائے گئے ہیں حالانکہ انہوں نے اس تقریب میں بھی شرکت نہیں کی تھی۔
