اسلام آباد: پاکستان سمیت دنیا بھر میں آج یوم استحصال کشمیر منایا جا رہا ہے۔
تفصیلات کے مطابق مقبوضہ کشمیر میں بھارت کے غیر قانونی اقدام کے 4 سال مکمل ہو گئے، پاکستان سمیت دنیا بھر میں آج یوم استحصال کشمیر منایا جا رہا ہے، شہر شہر کشمیریوں سے اظہار یک جہتی کے لیے مظاہرے ہوں گے۔
حریت کانفرنس کی کال پر مقبوضہ وادی میں آج یوم سیاہ منایا جا رہا ہے، مقبوضہ جموں و کشمیر میں پوسٹرز لگنے کے بعد انتظامیہ میں کھلبلی مچ گئی، اور قابض فورسز نے مزید نفری بڑھا دی، اور نام نہاد آپریشن شروع کر دیا۔
بھارت نے وادی میں آبادی کا تناسب بدلنے کا ایک اور گھناؤنا اقدام کیا ہے، ہندوؤں کو 2200 روپے ماہانہ کی قسط پر فلیٹ دیے جانے کا منصوبہ سامنے لے آیا۔
محبوبہ مفتی نے نئے منصوبے پر شدید تنقید کرتے ہوئے کہا کہ مقبوضہ وادی میں ہندوؤں کی آبادکاری کا بھارتی منصوبہ قابل مذمت ہے۔
