اسلام آباد: کھانسی کی ایک غیر معیاری دوا کے مارکیٹ میں فروخت کا انکشاف ہوا ہے، ڈریپ نے کھانسی کی دوا کیموڈرل کا ایک بیچ غیر معیاری قرار دے دیا ہے۔
تفصیلات کے مطابق ڈرگ ریگولیٹری اتھارٹی نے کیموڈرل سیرپ کا پراڈکٹ ری کال الرٹ جاری کیا ہے، جو کہ شہریوں، ڈاکٹرز، اور کیمسٹ سب کے لیے ہے، جس میں کہا گیا ہے کہ کیموڈرل سیرپ کے بیچ کے 1068 کو غیر معیاری قرار دیا گیا ہے۔
ڈریپ الرٹ کے مطابق کیموڈرل تین اجزا سے تیارکردہ کھانسی اورالرجی کا سیرپ ہے، نزلے اور چھینکوں میں استعمال ہوتی ہے، تاہم اس سیرپ میں سوڈیم سٹریٹ کی مطلوبہ مقدار شامل نہیں ہے، جس کی وجہ سے یہ دوا ری ایکشن کر سکتی ہے۔ اس لیے ڈریپ نے خبردار کیا ہے کہ متاثرہ کیموڈرل سیرپ بیچ استعمال سے درد معدہ کی شکایت ہو سکتی ہے، اور الرجک ری ایکشن کے ساتھ ساتھ نیند متاثر ہو سکتی ہے۔
کیموڈرل کف سیرپ الکیمے فارما حیدرآباد کا تیار کردہ ہے، مذکورہ بیچ کو سینٹرل ڈرگ لیبارٹری کراچی نے غیر معیاری قرار دیا ہے، ڈریپ نے فارما کمپنی کو متاثرہ بیچ مارکیٹ میں سپلائی نہ کرنے اور موجود متاثرہ بیچ مارکیٹ سے اٹھانے کی ہدایت کر دی ہے۔
کیمسٹ سے کہا گیا ہے کہ وہ کیموڈرل سیرپ کے متاثرہ بیچ کی سیل روکنے کے لیے اسٹاک چیک کریں، اور اسے فارما کمپنی کو واپس کریں۔
