خانیوال: صوبہ پنجاب کے شہر خانیوال کے آئی کلینک میں دوران آپریشن مریضہ انتقال کرگئی۔
تفصیلات کے مطابق خانیوال کے آئی کلینک میں دوران آپریشن 13 سالہ آسیہ انتقال کرگئی جبکہ ڈاکٹر عملے سمیت فرار ہونے میں کامیاب ہوگیا۔
پولیس کا کہنا ہے کہ لاش کو پوسٹ مارٹم کے لیے اسپتال منتقل کردیا گیا ہے، رپورٹ آنے کے بعد مزید کارروائی عمل میں لائی جائے گی۔
ذرائع کا کہنا ہے کہ مریضہ کی موت بے ہوشی کی دوا کی غلط مقدار میں دینے سے ہوئی۔
جاں بحق لڑکی کے والد کا کہنا ہے کہ بیٹی کو آنکھ کا آپریشن کروانے کے لیے ظفراقبال آئی کلینک پر لایا تھا، دوران آپریشن آسیہ کی موت واقع ہوئی۔
مزید پڑھیں: ڈاکٹر کی مبینہ غفلت سے ایک ماہ کا بچہ جاں بحق
مقتولہ آسیہ کے والد کا کہنا تھا کہ کلینک والوں نے آپریشن کے کاغذات بھی چھین لیے ہیں، آسیہ کے ورثا نے احتجاج کرتے ہوئے ڈاکٹر اور عملے کے خلاف سخت کارروائی کا مطالبہ کیا ہے۔
واضح رہے کہ چند روز قبل سندھ کے شہر جیکب آباد کے نجی میڈیکل سینٹر میں ڈاکٹر کی مبینہ غفلت سے ایک ماہ کا بچہ جاں بحق ہوگیا تھا، بچے کو سینے میں تکلیف پر میڈیکل سینٹر لایا گیا تھا۔
بچے کے والد غلام مصطفیٰ کا کہنا تھا کہ ڈاکٹر نے بچے کو 2 انجیکشن لگائے جس سے حالت بگڑ گئی، گھر لے جاتے ہوئے راستے میں بچہ دم توڑ گیا۔
