خان پور: چھوٹے بھائی کی شادی پر بڑے بھائی نے ایسا تحفہ دیا کہ جسے دیکھنے والے دیکھتے رہ گئے۔ اسّی ملکوں کی کرنسی نوٹوں کا ہار بھائی کو پہنا دیا۔ لوگوں کی توجہ کا مرکز دولہا کی بجائے نوٹوں کا ہار بن گیا، دولہا کے بھائی نے حب الوطنی کی مثال قائم کرتے ہوئے ہار میں بھارتی کرنسی کو شامل نہیں کیا۔
تفصیلات کے مطابق خان پور میں چھوٹے بھائی کی شادی پر بڑے بھائی نے دولہا کو سہرا بندی پر ایسا تحفہ دیا کہ دولہا سے زیادہ دلچسپی وہاں موجود لوگوں نے اس تحفہ پر ظاہر کی۔
اے آر وائی نیوز کے نمائندے فیاض بلوچ کے مطابق خانپور کے مقامی کونسلر اور بڑے بھائی اقبال صادق نے چھوٹے بھائی دلاور حسین کی شادی پر تیس سال کا شوق وار دیا اور اپنے بھائی کو 80 مختلف ممالک کے کرنسی نوٹوں کا ہار پہنا دیا۔ ہار میں کویت عمان، سعودی عرب اور دیگر ممالک کی کرنسی شامل ہے۔
پہلی شادی ایسی دیکھی جس میں دلہا سے زیادہ ہار لوگوں کی توجہ کا مرکز بنا رہا، اقبال صادق نے بتایا کہ اس ہار میں انڈیا کی کرنسی استعمال نہیں کی۔
اقبال صادق گزشتہ تیس سال سے یہ نوٹ جمع کررہے تھے، ان کو مختلف ممالک کے کرنسی نوٹ جمع کرنے کا بچپن سے شوق تھا، خان پور کی انوکھی شادی جس میں دولہے کے بھائی نے انوکھے انداز میں اپنی خوشی کا اظہار کیا۔
ہار کی مالیت لاکھوں روپے میں بتائی جا رہی ہے۔ اس موقع پر دولہا کا کہنا تھا کہ بھائی کی محبت کے انوکھے انداز پر دلی مسرت ہوئی ہے۔
