اسلام آباد : وزیر دفاع خواجہ آصف نے بھارت کو واضح پیغام دیا ہے کہ ہمارے خلاف کوئی حرکت کی تو ادھار نہیں رکھیں گے۔
تفصیلات کے مطابق وزیر دفاع خواجہ آصف نے بھارتی وزیر دفاع راج ناتھ کے بیان پر ردعمل دیتے ہوئے کہا کہ بھارتی حکمران الیکشن میں چار ووٹ اکٹھے کرنے کیلئے بھڑکیں مار رہے ہیں،ان میں اتنی جرأت نہیں ہے، اگرکی تو خمیازہ بھگتنا پڑے گا۔
خواجہ آصف کا کہنا تھا کہ بھارت کی خواہشیں کچھ بھی ہوسکتی ہیں، بھارت کی دہشت گردی کی تاریخ پرانی ہے، مودی جب گجرات کے وزیراعلیٰ تھے تب بھی مسلمانوں کا قتل عام کیا، ہشت گردی کی وجہ سےمودی کا امریکی ویزہ منسوخ ہوا۔
وزیر دفاع نے کہا کہ بھارت کی دہشت گردی کینیڈااور امریکا بھی پہنچ چکی ہے، ہمارے خلاف بھارت نے کوئی حرکت کی تو کوئی ادھار نہیں رکھیں گے۔
انھوں نے بتایا کہ پلوامہ ڈرامہ تھا، اسکو بہانہ بنا کر پاکستان میں جو جارحیت کی اسکا منہ توڑ جواب دیا اور خیرات میں پائلٹ واپس کیا گیا۔
خواجہ آصف کا مزید کہنا تھا کہ ہم خطرناک محل وقوع میں رہ رہے ہیں، بھارت اور افغانستان میں حالات سب کے سامنے ہیں، سب کو بتانا چاہتے ہیں نہ ماضی میں ادھاد رکھا نہ اب رکھیں گے۔
