لاہور : مسلم لیگ نون کے رہنماء خواجہ عمران نزیر نے کہا ہے کہ شہباز شریف وطن واپس آ رہے ہیں، بھرپور استقبال کریں گے، جس دن جنرل پرویز مشرف کو واپس لایا جائے گا، اس دن حسن اور حسین نواز بھی آ جائیں گے۔
تفصیلات کے مطابق لاہور میں مسلم لیگ نون کے اجلاس کے بعد میڈیا سے گفتگو کرتے ہوئے خواجہ عمران نزیر نے کہا کہ ججز کا معاملہ زیر بحث آیا ہے، نواز شریف سے اہل خانہ کو ملاقات کی اجازت نہ دینے کی مذمت کرتے ہیں۔
خواجہ عمران نزیر کا کہنا تھا اجلاس میں پاک فوج کے جوانوں کے لیے فاتحہ خوانی کی گئی، مسلم لیگ ن فوجی جوانوں کے ساتھ کھڑی ہے۔
ن لیگی رہنما نے کہا کہ شہباز شریف کے استقبال کیلئے ایئرپورٹ ضرور جائیں گے، شہباز شریف کی واپسی پر باجی فردوس کو افسوس ہوا ہو گا۔
ان کا کہنا تھا کہ آئی ایم ایف کا بجٹ آ رہا ہے، اس سے عوام کو بچانا ہے، پٹرول اور مہنگائی نے عوام کی کمر توڑ دی ہے، چندے اور اے ٹی ایم پر پلنے والوں کو تو کوئی فرق نہیں پڑتا، عوام کو پڑتا ہے۔
مزید پڑھیں : مسلم لیگ ن کے صدر شہباز شریف کل وطن واپس آئیں گے
انہوں نے واضح کیا کہ جس دن جنرل پرویز مشرف کو واپس لایا جائے گا، اس دن حسن نواز اور حسین نواز بھی آ جائیں گے۔
خیال رہے مسلم لیگ ن کے صدر شہباز شریف کل وطن واپس آرہے ہیں ، لیگی ترجمان مریم اورنگزیب نے کہا تھا شہباز شریف کل صبح چار بج کر پچاس منٹ پر لاہور پہنچیں گے۔
واضح رہے قومی اسمبلی میں اپوزیشن لیڈر شہبازشریف دس اپریل کو پوتی کی خیریت دریافت کرنے اور اپنے طبی معائنے کے لیے دس سے پندرہ دن کے لیے لاہور سے لندن گئے تھے۔
