مکہ مکرمہ : میدان عرفات میں خطبہ حج دیتے ہوئے شیخ عبداللہ بن سلیمان نے دعا کی کہ اللہ تعالیٰ انسانوں کو وباؤں اورآفات سے دور رکھے، تقویٰ اختیار کرنے والے کی ہرتنگ دستی دورکردی جاتی ہے۔
انہوں نے کہا کہ جو ایک دوسرے کاحق ہے وہ دیا جائے، بدن کی سلامتی کیلئے اپنی صحت کاخیال رکھنا بھی بہت ضروری ہے، ہم پر امراض کو پھیلنے سے روکنا لازمی امر ہے۔
اللہ نے جو بیماری دی ہے اس کی دوا بھی رکھی ہے، نبی کریم نے فرمایا جہاں طاعون پھیلے وہاں سے باہر نہ نکلو، امراض کو پھیلنے سے بچانے کے لیے حکومت کے اقدام سب کے سامنے ہیں ،
حج کارکن اعظم وقوف عرفہ آج ادا ہوگا، میدان عرفات میں سعودی عرب کے مفتیِ اعظم خطبہ حج دیں گے، عازمین منی پہنچ گئے، خطبہ حج مسجد نمرہ میں دیا جائے گا۔
شیخ عبداللہ بن سلیمان نے کہا کہ ہم گواہی دیتے ہیں کہ اللہ کے سوا کوئی عبادت کے لائق نہیں اور وہ واحد ہے، اللہ کےسوا کوئی شریک نہیں، اللہ شرک کرنیوالے کی زندگی کے تمام اعمال کوضائع کردیتاہے۔
شیخ عبداللہ بن سلیمان نے خطبہ حج دیتے ہوئے تقویٰ اختیار کرنے پر زور دیا اور کہا کہ اللہ کے سوا کسی کی عبادت نہیں کرنی چاہیے اور صرف اسی سے مدد مانگنی چاہیے۔
شیخ عبداللہ بن سلیمان نے کہا کہ اللہ تعالیٰ کا ارشاد پاک ہے کہ میری عبادت کرو اور میرے ساتھ کسی کو شریک نہ کرو، اللہ تعالیٰ نے حضرت محمد کو آخری نبی بنا کر بھیجا ہے۔
مسجد نمرہ میں خطبہ حج دیتے ہوئے انہوں نے کہا کہ اللہ اپنے بندوں کا امتحان لیتا ہے اور اگر وہ آزمائش میں پورے ہوجائیں تو اللہ کی جانب سے انہیں نوازا جاتا ہے، قرآن میں اللہ نے ارشاد فرمایا کہ تم میرے نعمتوں کو گننا چاہو تو گن نہیں سکتے۔
انہوں نے کہا کہ حکومت نے امراض کو پھیلنے سے روکنے کے بہترین اقدام کیے، بیماری کو پھیلنے سے بچاؤ کے لیے اقدام کیے گیے ہیں، حفاظتی اقدامات کا سہرا شاہ سلمان کے سرجاتا ہے۔
ضروری ہے کہ ہم اپنے لیے اور اپنی سرزمین کی حفاظت کے لیے دعا کریں، آج کے دن دعا کی جائے جہاں وبا ہے وہاں اللہ سلامتی رکھے،
آج کے دن اللہ حاجیوں کے عمل پر فرشتوں کے سامنے فخر فرماتا ہے، آج کے دن اللہ کے نبی نے حضرت بلال کو اذان کا حکم دیا، نماز ادا کی گئی، احادیث میں ہمیں تمام مناسک حج نظر آتے ہیں۔
شیخ عبداللہ بن سلیمان نے خطبہ دیتے ہوئے کہا کہ اپنے ماں باپ کے ساتھ حسن سلوک کا معاملہ کریں، اللہ تعالیٰ کے ساتھ ساتھ والدین کے حقوق بھی ادا کرنے چاہئیں،رشتہ داروں کے ساتھ صلح رحمی سے پیش آؤ ، ہمیشہ سیدھی اور صاف بات کیا کریں، اللہ تعالیٰ نے عدل اوراحسان کا حکم فرمایا ہے۔
انہوں نے کہا کہ اپنی بیویوں کے ساتھ حسن سلوک کے ساتھ پیش آؤ، ناحق قتل پر اللہ کا غضب نازل ہوتا ہے۔ اپنی بیویوں کے ساتھ حسن سلوک کے ساتھ پیش آؤ، اپنے بھائی بہنوں اور رشتہ داروں کا خیال کیا جائے، اللہ رب العزت نے قتل کو حرام قرار دیا، ناحق قتل کرنے والوں کیلئے اللہ نے دردناک عذاب رکھا ہے۔
یاد رہے کہ اس سال مزدلفہ میں حاجی شیطان کو مارنے کیلئے کنکریاں نہیں چنیں گے، کنکریاں حکومت کی جانب سے دی جائیں گی، کل صبح نماز فجر کے بعد حجاج کرام شیطان کو کنکریاں ماریں گے، قربانی کریں گے اوربال منڈوا کر احرام کھول دیں گے۔
حج کے موقع پر مکہ مکرمہ اور منیٰ،عرفات کے میدان میں باران رحمت برس گئی بارش کے بعد موسم خوشگوار ہوگیا، بارش کے دوران مسجدالحرام میں خانہ کعبہ کا غلاف تبدیل کیا گیا، سعودی محکمہ موسمیات کا کہنا ہے کہ حج کے دوران بارش کا سلسلہ جاری رہے گا۔
حج کے موقع پر کوروناوائرس سےبچاؤ کیلئےایس اوپیز پرسختی سے عملدرآمد کیا جارہا ہے، سعودی خبر رساں ایجنسی کے مطابق بغیر اجازت حج مقامات میں داخل ہونے پر اب تک 244افراد کو گرفتار کیا جاچکا ہے۔
بغیراجازت حج مقامات پرداخلے پر12 ذوالحج تک پابندی ہے، بغیراجازت نامہ مشاعر مقدسہ جانے پر 10ہزار ریال جرمانے کی سزا ہے۔ ترجمان سیکیورٹی فورس کا کہنا ہے کہ حفاظتی تدابیر کی پابندی سب پر لازم ہے۔
میدان عرفات میں مسجد نمرہ کو پہلے ہی سینیٹائز کردیا گیا تھا اور صفائی کا خصوصی انتظام کیا گیا ہے، نمازیوں کے درمیان سماجی فاصلے کے لیے نشانات بھی لگے ہوئے ہیں، قافلے سورج غروب ہونے کے بعد میدان عرفات سے مزدلفہ روانہ ہوں گے، مغرب اور عشا کی نمازیں ایک اذان اور دو تکبیروں کے ساتھ مزدلفہ میں ادا کی جائیں گی۔
