لاہور کے تھانہ گجرپورہ کی حدود سے اغواء ہونے والے 10 سالہ مغوی بچہ کو پولیس مقابلے بعد بازیاب کروا کر3 ملزمان کو گرفتار کرلیا گیا۔
اے آر وائی نیوز کی رپورٹ کے مطابق اغواء برائے تاوان سیل اور اغواء کاروں کے درمیان فائرنگ کا تبادلہ ہوا جس کے بعد دس سالہ مغوی بچے زمان کو بحفاظت بازیاب کروا لیا گیا۔
اس کامیاب کارروائی کے دوران تینوں ملزمان کے قبضے سے اسلحہ اور وصول کی گئی 80 لاکھ روپے تاوان کی رقم بھی برآمد کرلی گئی ہے۔
چوہنگ کے علاقے میں اغواء برائے تاوان سیل اور ملزمان کے درمیان فائرنگ کا تبادلہ ہوا تاہم پولیس اہلکار محفوظ رہے۔
پولیس کے مطابق 10سالہ زمان کو چند گھنٹے قبل گجر پورہ سے اغوا کیا گیا تھا، اغواکاروں نے بچے کے والد سے3کروڑ روپے تاوان طلب کیا تھا۔
اس حوالے سے ڈی ایس پی میاں انجم نے میڈیا کو بتایا کہ مغوی بچے کے والد نے ملزمان کو80لاکھ روپے تاوان کی رقم ادا کی۔
پولیس نے کامیاب کارروائی کرکے بچے کو بازیاب تینوں ملزمان کو گرفتار کرکے ان کیخلاف مقدمہ درج کرلیا ہے، مذکورہ ملزمان کی گرفتاری جدید ٹیکنالوجی کی مدد سےعمل میں آئی۔
ڈی ایس پی میاں انجم توقیر کے مطابق گرفتار ملزمان میں ابرار حسن، محمد عدیل اور محمد بابر شامل ہیں۔ ایس پی نارتھ فرقان بلال نے بتایا کہ ملزمان کو پراسیکیوشن پارٹنر شپ کی مدد سے سخت سے سخت سزا دلوائی جائے گی۔
اس سے قبل یکم فروری کو تھانہ سرائے مغل پولیس نے ڈی ایس پی پتوکی کی ہدایت پر بروقت کارروائی کرتے ہوئے چار سالہ مغوی بچہ بازیاب کروا کر ملزم کو گرفتار کیا گیا تھا۔
تھانہ سرائے مغل پولیس کو 15 پر مرید عباس نامی شہری نے اپنے 4 سالہ بیٹے حسنین کے اغوا ہونے کی اطلاع دی تھی
پولیس نے سی سی ٹی وی کیمروں کی مدد سے موٹر سائیکل سوار ملزم کو ٹریس کرکے گرفتار کیا اور اس کے قبضے سے بچہ بازیاب کروا لیا۔
