The news is by your side.

Advertisement

کراچی: 12 سالہ بچے کے اغوا و قتل اور لاش جلانے والے ملزمان کو سزائے موت

کراچی: صوبہ سندھ کے دارالحکومت کراچی میں 12 سالہ بچے کو اغوا کرنے، قتل کرنے اور لاش جلانے والے ملزمان کو 2، 2 بار سزائے موت سنا دی گئی۔

تفصیلات کے مطابق انسداد دہشت گردی عدالت میں 12 سالہ بچے کے اغوا اور قتل کیس کی سماعت ہوئی، ملزمان پر جرم ثابت ہوگیا جس کے بعد عدالت نے فیصلہ سنا دیا۔

عدالت نے 3 ملزمان کو اغوا برائے تاوان اور قتل کے جرم میں 2، 2 بار سزائے موت کا حکم دیا، شواہد چھپانے کے جرم میں تینوں ملزمان کو 7 سال قید بامشقت اور 1، 1 لاکھ روپے جرمانے کی سزا بھی سنائی گئی۔

عدالت نے ملزمان کو 2 لاکھ روپے فی کس مقتول کے ورثا کو ادا کرنے کا حکم دیا۔ ملزمان میں شمشیر، سلمان اور عبدالستار شامل ہیں۔

استغاثہ کے مطابق ملزمان نے جنوری 2021 میں سعید آباد سے 12 سالہ بچے شاہد کو تاوان کے لیے اغوا کیا تھا، ملزمان نے بچے کو قتل کر کے لاش کو جلا کر اسکیم 33 میں دفنا دیا۔

استغاثہ کا کہنا تھا کہ ملزم شمشیر بچے کا پڑوسی اور بچے کے والد کا دوست تھا، ملزمان نے بچے کی رہائی کے لیے 1 کروڑ روپے تاوان مانگا تھا، ملزمان اور بچے کے والد کے درمیان 70 لاکھ روپے تاوان طے پایا تھا۔

Comments

یہ بھی پڑھیں