واشنگٹن : امریکا نے شمالی کوریا کو متنبہ کیا ہے کہ روس کو ہتھیار کی فراہمی یا فروخت کیے جانے پر وہ اس کیخلاف پابندیاں عائد کرسکتا ہے۔
اس حوالے سے وائٹ ہاؤس نیشنل سکیورٹی کونسل کے ایک ترجمان نے ایک بیان میں شمالی کوریا پر زور دیا ہے کہ وہ روس کو ہتھیار فراہم یا فروخت نہ کرنے کے حوالے سے بین الاقوامی سطح پر ظاہرکردہ اپنے مؤقف کی پاسداری کرے۔
وزارت خارجہ کے ترجمان میتھیو ملر نے کہا کہ شمالی کوریا سے ہتھیاروں کی کسی بھی قسم کی روس منتقلی اقوام متحدہ کی سلامتی کونسل کی متعدد قراردادوں کی خلاف ورزی ہوگی۔ انہوں نے مزید کہا کہ ایسا ہونے کی صورت میں امریکہ بلاتاخیر نئی پابندیاں عائد کرے گا۔
امریکی ترجمان نے کہا ہے کہ شمالی کوریائی رہنما کِم جونگ اُن کے دورۂ روس کے دوران دونوں ملکوں کے درمیان مذاکرات میں ہتھیاروں سے متعلق بات چیت جاری رہنے کی توقع کی جا رہی ہے۔
اس کے علاوہ امریکی وزارت دفاع کے پریس سکریٹری پیٹرک رائیڈر نے کہا کہ اس سلسلے میں واشنگٹن آئندہ بھی صورتحال کا بغور جائزہ لیتا رہے گا۔
واضح رہے کہ شمالی کوریا کے سربراہ کم جونگ اُن نجی ٹرین میں ماسکو پہنچ گئے ہیں، کِم اتوار کی رات دیر گئے پیانگ یانگ سے روانہ ہوئے تھے۔
اس حوالے سے کریملن کے ترجمان دمتری پیسکوف نے آن لائن پوسٹ کی گئی ایک ویڈیو میں کہا کہ کِم کا دورہ روس اور پوٹن سے ملاقات ایک مکمل دورہ ہوگا۔
پیسکوف کے مطابق مذاکرات کا مرکزی موضوع پڑوسی ممالک کے درمیان تعلقات ہوں گے۔ انہوں نے کہا کہ ہم اپنی دوستی کو مضبوط کرتے رہیں گے۔
