پشاور: کے پی اسمبلی نے وزیراعظم عمران خان پر اعتماد کی قرارداد منظور کرلی ہے۔
تفصیلات کے مطابق قرارداد صوبائی وزیر شوکت یوسفزئی نے پیش کی، جس میں ارکان صوبائی اسمبلی نے وزیراعظم عمران خان پر مکمل اعتماد کا اظہار کیا۔
اسمبلی میں منظور کی گئی قرارداد میں کہا گیا کہ کرونا وبا نےدنیا کی بڑی بڑی معیشتوں کو بحران کا شکار کیا تاہم وزیراعظم کے مدبرانہ کردار نے ملک کو بحران سے بچایا اور ملک کو معاشی طور پر مضبوط بنانےکیلئے عملی اقدامات اٹھائے۔
قرارداد کے متن میں کہا گیا کہ وزیراعظم نے عالمی سطح پر ملک کے وقار میں اضافہ کیا یہ ایوان وزیراعظم کی قیادت پربھرپور اعتماد کا اظہار کرتا ہے اور یہ اسمبلی وزیراعظم عمران خان کوخراج تحسین پیش کرتی ہے۔
اس موقع پر اپوزیشن نے شدید ہنگامہ آرائی کی اور حکومت مخالف نعرے لگائے تاہم اپوزیشن کے شور شرابے کو پس پشت ڈالتے ہوئے قرارداد کو کثرت رائے سے منظور کرلیا گیا۔
یہ بھی پڑھیں: تحریک عدم اعتماد کا معاملہ ، حکومت نے بڑا فیصلہ کرلیا
دوسری جانب حکومت نے او آئی سی اجلاس سے پہلے ہی عدم اعتماد کا معاملہ نمٹانے کا فیصلہ کیا ہے، ذرائع کا کہنا ہے کہ او آئی سی اجلاس کے وقت ملک سیاسی بحران کا متحمل نہیں ہوسکتا۔
یاد رہے وزیراعظم نے پنجاب کے وزیراعلیٰ کو تبدیل کرنے کا فیصلہ کرلیا اور پنجاب کے نئے وزیراعلیٰ کے انتخاب کیلئے اگلا 5رکنی کمیٹی بنا دی ہے، کمیٹی ترین گروپ، علیم خان اور ق لیگ سے نئے وزیراعلیٰ کیلئےمشاورت کرے گی ، پارلیمانی پارٹی رہنماؤں سے بھی نئےوزیراعلیٰ کیلئے مشاورت کی جائے گی۔
