اسلام آباد: خیبر پختونخواہ کے بلدیاتی الیکشن کے نتائج پر غور کے لئے پی ٹی آئی کی بڑی بیٹھک آج اسلام آباد میں ہونے جارہی ہے، وزیراعظم اجلاس کی صدارت کرینگے۔
ذرائع کے مطابق کےپی بلدیاتی انتخابات نتائج پر وزیر اعظم نے اہم فیصلوں کی تیاریاں شروع کردی ہیں، بلدیاتی انتخابات پر وزیراعظم کے نئے پلان پرجلد عملدرآمد شروع ہوگا۔
اسی تناظر میں وزیر اعظم نے پہلے مرحلے میں آج پی ٹی آئی مرکزی قیادت کا اجلاس بلالیا ہے، اجلاس وزیراعظم ہاؤس میں ہوگا، جہاں پنجاب ،خیبرپختونخوا کےبلدیاتی انتخابات پر مشاورت کی جائےگی، آج کے اہم ترین اجلاس میں پنجاب، خیبرپختونخوا کےوزرائےاعلیٰ شریک ہونگے جبکہ گورنر پنجاب اور گورنرسندھ بھی اجلاس میں شریک ہونے کی ہدایت کی گئی ہے۔
ذرائع کے مطابق وفاقی وزیر اسدعمر، شفقت محمود، پرویزخٹک، علی امین گنڈا پور اور علی زیدی بھی اجلاس میں شریک ہونگے، اجلاس میں عامرکیانی، سیف اللہ نیازی ،دیگر قائدین کو بھی مدعو کیا گیا ہے۔
ذرائع کا کہنا ہے کہ اجلاس دوپہر ڈیڑھ بجے وزیر اعظم ہاؤس میں ہوگا، جس میں اہم فیصلےمتوقع ہیں، پی ٹی آئی قیادت نئےتنظیمی ڈھانچےپر مشاورت کرےگی، صوبوں کےمرکزی رہنماؤں پر مشتمل نئی کمیٹیاں بنانے پر غور ہوگا۔
ذرائع کا یہ بھی کہنا ہے کہ اجلاس ضلعی، تحصیل، یوسی تنظیموں کیلئےخطرےکی گھنٹی ثابت ہوسکتاہے، وزیر اعظم دوسرےمرحلےمیں کورکمیٹی اجلاس بھی جلدطلب کرینگے۔
تحریک انصاف کی سینئر لیڈرشپ کا اجلاس آج وزیر اعظم کی سربراہی میں منعقد ہو گا، اس مشاورتی اجلاس میں اہم تنظیمی اور پالیسی امور زیر بحث آئیں گے ، اجلاس کے فیصلوں سے میڈیا کو آگاہ کروں گا
— Ch Fawad Hussain (@fawadchaudhry) December 24, 2021
ادھر وفاقی وزیر اطلاعات فواد چوہدری نے اپنے ٹوئٹ میں کہا کہ تحریک انصاف کی سینئر لیڈر شپ کا اجلاس آج وزیراعظم کی سربراہی میں ہوگا، مشاورتی اجلاس میں اہم تنظیمی اور پالیسی امور زیر بحث آئیں گے، اجلاس کے فیصلوں سے میڈیا کو آگاہ کروں گا۔
