خیبر پختونخوا کی حکومت نے صوبے کے عوام کیلیے بڑے امدادی پروگرام کا اعلان کر دیا ہے۔
اے آر وائی نیوز کے مطابق خیبر پختونخوا کی حکومت نے صوبے کے عوام کے لیے بڑے امدادی پروگرام کا اعلان کر دیا ہے خاندان کے سربراہ کی موت پر 10 لاکھ روپے مالی مدد کی جائے گی۔
وزیر اعلیٰ خیبر پختونخوا علی امین گنڈاپور نے صوبے کے عوام کو کسی بھی ناگہانی صورتحال میں مالی مشکلات سے بچانے کے لیے بڑا اعلان کر دیا ہے۔
صوبہ خیبر پختونخوا میں کسی بھی خاندان کے سربراہ کے انتقال پر اس کے اہلخانہ کو بڑی امدادی رقم دی جائے گی۔
ترجمان وزیراعلیٰ فراز مغل کے مطابق 60 سال سے کم عمر میں انتقال کرنے والے خاندان کے سربراہ کے ورثا کو 10 لاکھ روپے جب کہ 60 سال سے زائد عمر میں انتقال کرنے والے شخص کے ورثا کو 5 لاکھ روپے دیے جائیں گے۔
انہوں نے بتایا کہ اس حوالے سے کے پی حکومت این جی او کے ساتھ ایک مفاہمتی یادداشت پر دستخط بھی کرنے والی ہے۔
وزیراعلیٰ کے پی کا کہنا ہے کہ خیبر پختونخوا حقیقی معنوں میں ریاست مدینہ بن رہا ہے۔
