پشاور: عوامی خدمات کی آن لائن فراہمی کیلیے خیبر پختونخوا حکومت نے اہم اقدام اٹھاتے ہوئے تمام عوامی خدمات کی فراہمی کے عمل کو ڈیجیٹائز کرنے کا فیصلہ کر لیا۔
عوامی خدمات کی آن لائن فراہمی کیلیے ڈیجیٹل پبلک سروسز کیٹلاگ مرتب کر لیا گیا جس میں فی الوقت ڈیجیٹل کیٹلاگ میں 26 محکموں کی 106 عوامی خدمات شامل ہیں، صوبائی حکومت کی طرف سے فراہم باقی خدمات کو بھی کیٹلاگ میں شامل کرنے کا فیصلہ کیا گیا ہے۔
تمام صوبائی محکموں کو ڈیجیٹل پبلک سروسز کیٹلاگ کیلیے ڈیٹا فراہم کرنے کی ہدایت جاری کرتے ہوئے وزیر اعلیٰ سیکرٹریٹ نے تمام انتظامی سیکرٹریز کو مراسلہ ارسال کر دیا جس میں کہا گیا کہ اس وقت صرف 29.55 فیصد عوامی خدمات ڈیجیٹائزڈ ہیں، تمام محکمے ڈیجیٹل کیٹلاگ میں شامل کرنے کیلیے ڈیٹا فراہم کریں۔
مراسلے میں کہا گیا کہ کیٹلاگ تمام محکموں سے فراہم عوامی خدمات کے سینٹر لائزڈ بینک کے طور پر کام کرے گا، ڈیجیٹل پبلک سروس کیٹلاگ سے شہریوں کو عوامی خدمات کے حصول میں آسانی ہوگی، شہری مختلف حکومتی خدمات اور سہولتیں گھر بیٹھے آن لائن حاصل کر سکیں گے۔
مزید کہا گیا کہ ڈیجیٹائزیشن کے بغیر سرکاری خدمات کی فراہمی کا عمل پیچیدہ رہتا ہے، موجودہ طریقہ سے تاخیر، عدم فعالیت اور عوام کیلیے مشکلات پیدا ہوتی ہیں، کیٹلاگ کو اگلے مرحلے میں ’دستک پلیٹ فارم‘ کے ساتھ منسلک کیا جائے گا۔
