پشاور: خیبرپختونخوا میں خواجہ سراؤں کیلئے قبرستان کی زمین مختص کرنے کا فیصلہ کیا گیا ہے۔
تفصیلات کے مطابق گزشتہ دنوں گورنر خیبرپختونخوا غلام علی سے خواجہ سراؤں کے وفد نے گورنر ہاؤس میں ملاقات کی تھی، ملاقات میں خواجہ سراؤں کے وفد نے کمیونٹی کو درپیش مسائل سے گورنر کو آگاہ کیا اور اپنے مطالبات بھی گورنر کے سامنے رکھے تھے۔
وفد نے گورنر کے پی کے سے مطالبہ کیا تھا شہر میں خواجہ سراؤں کیلئے قبرستان کی جگہ مختص کی جائے اور علماء کو ہمارے جنازے پڑھانے پر رضامند کیا جائے۔
تاہم اب مشیر وزیراعلیٰ مشال یوسفزئی نے جاری کردہ بیان میں بتایا کہ خواجہ سراؤں کیلئے 5 کنال کی زمین قبرستان کیلئے مختص کررہے ہیں، خواجہ سراؤں کے اکثریتی علاقوں میں قبرستان کیلئے زمین مختص کرینگے۔
مشال یوسفزئی نے بتایا کہ ہر ڈویژن کے سرکاری اسپتال میں خواجہ سراؤں کیلئے خصوصی وارڈ قائم ہوگا، بہترین انتظامات کے ساتھ خواجہ سراؤں کا علاج کیا جا سکے گا۔
