منی پور میں بڑھتی عسکریت پسندی کے دوران مودی سرکار کی غیر منصفانہ حکمت عملی اور متعصبانہ پالیسیوں کے باعث منی پور کی وادی امپھال میں عسکریت پسندوں کا راج ہو گیا ہے، اور کوکی قبائل کی زندگی اجیرن ہو گئی ہے۔
بھارت اقلیتوں کے حقوق کے تحفظ میں ناکام دکھائی دے رہا ہے، سرکاری سرپرستی میں کوکی قبائل کی جائیدادیں غیر محفوظ ہو گئی ہیں، صدارتی راج کے نفاذ کے باوجود صورت حال بدتر ہو چکی ہے، اور سپریم کورٹ کے احکامات کی بھی کھلی خلاف ورزی کی جا رہی ہے۔
بھارتی میڈیا رپورٹس کے مطابق گھروں پر حملے ہو رہے ہیں، لوٹ مار جاری ہے، زبردستی قبضے کیے جا رہے ہیں، اور شہریوں کے لیے واپسی کے دروازے بند کر دیے گئے ہیں، جب کہ کوکی قبائل کے افراد کے گھروں کے دروازوں پر عسکریت پسند گروہوں نے نشانات لگا دیے ہیں، جس سے مقامی لوگوں میں دہشت پھیلی ہوئی ہے۔
امریکا آنے والے غیر ملکیوں کو 30 دن سے زائد قیام پر کیا کرنا ہوگا؟
بھارتی میڈیا کا کہنا ہے کہ نام نہاد سیکیورٹی کے نام پر مودی سرکار کی تعینات کردہ بھارتی فورسز خاموش تماشائی بنی ہوئی ہیں، جدید اسلحے سے لیس عسکریت پسندوں کی فائرنگ سے علاقے میں خوف و ہراس کی لہر پھیلی ہوئی ہے، مقامی افراد کا کہنا ہے کہ میتی قبائل سے وابستہ عسکریت پسندوں (آرامبائی تنگگول) کے خلاف کوئی کارروائی نہیں کی گئی ہے۔
ان کا کہنا ہے کہ بھارتی حکومت ان عسکریت پسندوں (آرامبائی تنگگول) سے ملی ہوئی ہے، کاروبار عسکریت پسندوں کی کمائی کا ذریعہ ہیں، جو کماتے ہیں انھیں دینا پڑتا ہے، بھارتی فورسز نے گاؤں کے لوگوں کو لوٹنے میں بھی عسکریت پسندوں کی مدد کی، ان کا یہ بھی کہنا ہے کہ عسکریت پسندوں کی جانب سے ان کے فون چیک کیے جاتے ہیں، اگر کوکی برادری سے بات کریں تو دھمکایا جاتا ہے، ساتھ ہی جرمانہ بھی کیا جاتا ہے۔
بھارتی میڈیا کے مطابق منی پور فسادات پر نریندر مودی کی مسلسل خاموشی پر انھیں شدید تنقید کا سامنا ہے، منی پور کے بگڑتے حالات عکاسی کرتے ہیں کہ مودی سرکار کے ایجنڈے میں اقلیتیں کبھی ترجیح نہیں رہیں۔
