کویت سٹی: کویت میں نئے تعلیمی سال میں سرکاری و نجی اسکولوں میں طلبہ کی سو فیصد حاضری کا فیصلہ کیا گیا ہے۔
مقامی اخبار الرای کے مطابق وزارت تعلیم کے تحت کام کرنے والی کمیٹی نے بتایا کہ سرکاری و نجی اسکولوں سمیت انٹرنیشنل اور کمیونٹی اسکول طلبہ کے لیے کھولے جائیں گے۔
کمیٹی کا کہنا تھا کہ انٹرنیشنل اور کمیونٹی اسکولوں میں جہاں طلبہ کم تعداد میں ہیں، وہاں صبح کی شفٹ میں تدریسی عمل ہوگا البتہ سرکاری اور ان نجی اسکولوں میں جہاں طلبہ کی تعداد زیادہ ہے وہاں صبح کے وقت دو شفٹوں میں تدریسی عمل جاری رکھا جائے گا۔
کمیٹی نے کہا کہ نئے تعلیمی سال میں اسکول صبح ساڑھے ساڑھے سات بجے کھلیں گے اور تین بجے دوپہر تک تعلیمی سلسلہ جاری رہے گا، طلبہ کو کرونا وبا سے بچانے کے لئے کلاسوں میں سماجی فاصلے کا خاص خیال رکھا جائے گا۔
یہ بھی پڑھیں: کویت: شہریوں اور غیر ملکیوں کو اہم ہدایت جاری
اسکولز کو کب کھولا جائے گا؟ اس سے متعلق تفصیلات جاری نہیں کی گئیں۔
دوسری جانب کویت میں سرکاری دفاتر کو بھی پندرہ اگست سے کھولنے کا فیصلہ کیا گیا ہے، کویتی کابینہ نے اہم ترین فیصلے کی منظوری دے دی ہے۔
کویت کے وزیر صحت ڈاکٹر باسل حمود الصباح کی جانب سے جاری بیان میں کہا گیا کہ اعداد وشمار سے واضح ہوتا ہے کہ ملک میں کرونا کی صورتحال قابو میں آگئی ہے۔
