کویت سٹی : سوسائٹی آف انجینئرز آف کویت نے 12ہزار تارکین وطن انجینئرز کی ڈگریاں مشکوک قرار دے دیں، متعدد انجینئرز نے دوبارہ امتحان دینے سے ہی انکار کردیا۔

تفصیلات کے مطابق کویت سوسائٹی آف انجینئرز کے سربراہ انجینئر فیصل الاطل نے کہا ہے کہ رجسٹرڈ انجینئروں کی فہرست سے12ہزار سے زیادہ تارکین وطن انجینئرز کے نام فہرست سے اس لئے نکال دیئے گئے ہیں کیونکہ ان کی ڈگریوں کی متعلقہ حکام نے تصدیق نہیں کی ہے جبکہ بعض انجینئرز نے سوسائٹی کے تیار کردہ امتحانات دینے سے ہی انکار کردیا ہے۔

انجینئر الاطل نے میڈیا کو بیان دیتے ہوئے کہا کہ یہ معاملہ سوسائٹی آف انجینئرز کو ایک الجھن میں ڈال رہا ہے کیونکہ حکومت نے ابھی تک اس مسئلے پر کوئی فیصلہ نہیں لیا ہے۔

انجینئر الاطل نے مزید کہا کہ چونکہ ڈگریوں کی اکثریت کو تسلیم اور تصدیق نہیں کیا گیا ہے لہذا سوسائٹی کو اب تک "جعلی” ڈگریوں کی تعداد کا قطعی علم نہیں ہے۔

علاوہ ازیں سوسائٹی کے جاری کردہ سرٹیفکیٹ میں بھی دھوکہ دہی کا انکشاف ہوا ہے تاہم تفتیش کے بعد مشتبہ افراد کو پبلک پراسیکیوشن کے پاس بھیج دیا گیا ہے جبکہ تفتیش کے دوران یہ بات بھی سامنے آئی کہ ان میں سے متعدد ملزمان پراسیکیوشن میں مقدمات درج ہونے سے قبل ہی ملک چھوڑ کر جاچکے ہیں۔