کویت: سکستھ رنگ روڈ پر خوفناک ٹریفک حادثے کے نتیجے میں معروف پاکستانی شخصیت جان کی بازی ہار گئی، حادثے میں ان کی بیوی بھی شدید زخمی ہوئی، جنہیں اسپتال میں طبی امداد فراہم کی جارہی ہے۔
بین الاقوامی خبر رساں ادارے کی رپورٹ کے مطابق جنرل فائر فورس کے شعبہ تعلقات عامہ اور میڈیا کا کہنا ہے کہ سینٹرل آپریشنز ڈیپارٹمنٹ کو کل صبح اطلاع موصول ہوئی کہ سکستھ رنگ روڈ پر دو گاڑیوں میں خوفناک تصادم ہوا ہے، جس کے بعد مشرف فائر اسٹیشن کو حادثے کے مقام پر روانہ کردیا گیا۔
انتظامیہ کا کہنا تھا کہ فائر فائٹرز کے پہنچنے پر پتہ چلا کہ دو گاڑیوں کے درمیان تصادم ہوا ہے، جبکہ حادثے میں جاں بحق ہونے والے ڈرائیور کو محمد نعیم جان کے نام سے شناخت کیا گیا، ان کے ساتھ بیٹھی ان کی بیوی بھی حادثے میں شدید زخمی ہوئی ہیں۔
فائر فائٹرز نے لاش کو برآمد کرنے اور اسے فرانزک افسران کے حوالے کرنے کا کام کیا جبکہ انہوں نے زخمی خاتون کو نکال کر ایمرجنسی میڈیکل ٹیکنیشنز کے حوالے کر دیا۔
ٹریفک حادثے میں جاں بحق ہونے محمد نعیم جان کا شمار کویت کی ان معروف شخصیات میں ہوتا تھا جو دیار غیر میں رہ کر بھی ملک کا روشن کرتے تھے، مرحوم کا تعلق پشاور سے تھا جبکہ وہ روزگار کے سلسلے میں کویت میں سکونت اختیار کئے ہوئے تھے۔
محمد نعیم جان کویت میں منعقد ہونے والے کسی بھی پاکستانی ایونٹ میں کسی نہ کسی صورت میں اپنا حصہ ضرور ڈالتے تھے، محمد نعیم جان کی اچانک موت پر ہر کویت میں مقیم ہر پاکستانی غمگین ہے۔
