لندن : طبی ماہرین کا کہنا ہے کہ بھنڈی کا استعمال انسانی صحت کے لیے انتہائی مفید ہے۔
بھنڈی ہر گھرمیں استعمال ہونے والی مرغوب غذا ہے، اس میں موجود فائبر نہ صرف ہڈیوں کو مضبوط کرتا ہے بلکہ شوگر جیسی موذی بیماریوں سے بھی محفوظ رکھتا ہے۔
برطانیہ میں حالیہ تحقیق کے بعد ماہرین کا کہنا ہے کہ بھنڈی کا شمار ایسی ترکاریوں میں ہوتا ہے، جن میں وافر مقدار مفید اجزا پائے جاتے ہیں، جو مختلف امراض سے بچاؤ میں معاون ثابت ہوتے ہیں، یہ اجزا آنتوں کو صحت مند رکھنے میں اہم کردار ادا کرتے ہیں اور سرطان سے بچاتے ہیں۔
بھنڈی میں صحت سے متعلق کئی راز چھپے ہیں، بھنڈی میں بھرپورمقدار میں فائبرپایا جاتا ہے جو بلڈ شوگر کو کنٹرول کرتا ہے، اس لئے یہ ذیابیطس کے مریضوں کے لئے بہت فائدہ مند ہے جبکہ دل کے امراض سے بچانے میں معاون ثابت ہوتی ہے۔
اس میں کیلشیم پایا جاتا ہے جو ہڈیوں کو مضبوط بناتا ہے اور جوڑوں کے درد میں آرام پہنچاتا ہے، اس میں موجود لیس دار مادہ ہڈیوں کے لئے بہت مفید ہوتا ہے۔
بھنڈی میں وٹامن سی بھی بڑی مقدار میں پایا جاتا ہے، جو دمہ کی علامات کو پنپنے سے روکتا ہے۔
بھنڈی ایسی سبزی ہے جس میں گلوکوز کی سطح جسم میں برقرار رکھنے کی صلاحیت ہے۔ دوسری طرف بھنڈی میں اینٹی آکسیڈنٹ اجزا سے بھرپور سبزی ہے، جس سے مدافعتی نظام کو فائدہ پہنچتا ہے۔ اس میں موجود وٹامن سی مدافعتی نظام کو خون کے سفید خلیات پیدا کرنے کے لیے متحرک کرتا ہے اور یہ جراثیم اور بیماریوں کے حملے کے خلاف لڑنے میں مدد دیتے ہیں۔