لاہور: پنجاب کی مقامی حکومت نے دارالحکومت میں آلائشوں کے تعفن کو ختم کرنے کے لیے مختلف علاقوں میں 1500 لیٹر عرق گلاب کا چھڑکاؤ کیا۔
اے آر وائی نیوز کی رپورٹ کے مطابق لاہور ویسٹ مینیجمنٹ کمپنی (ایل ڈبلیو ایم سی) کے ترجمان کی جانب سے جاری اعلامیے میں بتایا گیا ہے کہ آلائشوں کے تعفن کے خاتمے کے لیے بیشتر علاقوں میں عرق گلاب کا اسپرے کیا گیا۔
ترجمان ایل ڈبلیو ایم سی کے مطابق عید کے دوسرے روز بھی صفائی آپریشن جاری ہے جس کے تحت لاہور کے علاقے لکشمی چوک، راج گڑھ، مزنگ، گلبرگ، فیروزپور روڈ سمیت دیگر علاقوں میں 1500 لیٹر عرق گلاب کا چھڑکاؤ کیا گیا۔
فیاض الحسن چوہان کا بیان
دوسری جانب پنجاب کے وزیراطلاعات فیاض الحسن چوہان نے کہا ہے کہ عید الاضحیٰ کے موقع پر بزدار حکومت، انتظامیہ نے صفائی ستھرائی کے نظام کو فوکس کیا ہوا ہے جس کے لیے خصوصی آپریشن کیا جارہا ہے۔
اُن کا کہنا تھا کہ پنجاب کے تمام اضلاع میں صفائی کےبروقت اقدامات کیےگئے ہیں، ہمارا بنیادی فوکس آلائشیں اکٹھی کرنا ،اسٹورکرنا، اور انہیں مٹی میں تلف کرنا ، پنجاب میں7113گاڑیاں اور28165 افرادپرمشتمل عملہ کام کررہا ہے، صوبے میں ایک اندازے کے مطابق 93 ہزار 500 ٹن الائشیں ٹھکانے لگائیں جائیں گی۔
وزیراطلاعات کا کہنا تھا کہ یونین کونسلوں میں صفائی کے لیے کیمپ لگائےگئےہیں جبکہ آلائشوں کو تلف کرنےکےلیے بیگزبھی تقسیم کیےگئے ہیں، ایل ڈبلیوایم سی کی جانب سے1.7 ملین بیگز تقسیم کیےگئے، صفائی کے آپریشنز کی خصوصی کنٹرول رومز سے نگرانی کی جارہی ہے، صفائی کے بعد چونے کا چھڑکاؤ بھی کیا جائے گا جس میں چار لاکھ گلوگرام سے زائد چونے کا استعمال کیا جائے گا۔
