لاہور کی مقامی عدالت نے ڈیفنس کے نجی اسکول میں طالبہ تشدد کیس میں تین طالبات کی 30 جنوری تک عبوری ضمانت منظور کر لی۔
کیس کی حالیہ پیش رفت میں ایڈیشنل سیشن جج چوہدری ظفر اقبال نے عمائمہ، جنت ملک اور کائنات 3 ملزماؤں کی ضمانت قبل از گرفتاری کی درخواستوں پر سماعت کی۔
طالبات کے وکیل نے دلائل دیے کہ پولیس نے حقائق سے برعکس مقدمہ درج کیا، طالبات کسی قسم کے تشدد میں ملوث نہیں، عدالت ضمانت منظور کرے تاکہ شامل تفتیش ہو کر اپنی بے گناہی ثابت کر سکیں ۔
وکیل کے دلائل سننے کے بعد عدالت نے تینوں لڑکیوں کو 50، 50 ہزار روپے کے ضمانتی مچلکے جمع کروانے کا حکم دے دیا۔
عدالت نے پولیس کو 30 جنوری تک طالبات کی گرفتاری سے روک دیا ساتھ ہی آئندہ سماعت پر رپورٹ طلب کر لی ۔
واضح رہے کہ تینوں ملزماؤں کے خلاف اپنی ہم جماعت طالبہ کو نشہ سے منع کرنے پر تشدد کرنے کا الزم ہے۔
خیال رہے کہ گزشتہ روز متاثرہ لڑکی کے والد نے 4 لڑکیوں کے خلاف مقدمہ درج کیا تھا۔
پولیس کی جانب سے مقدمہ اس وقت درج کیا گیا تھا جب متاثرہ لڑکی کو ساتھی طالبات کی جانب سے مبینہ طور پر تشدد کرنے کی ویڈیو سماجی رابطے کی ویب سائٹ ٹوئٹر پر وائرل ہوئی تھی۔
