لاہور : لاری اڈہ آؤٹ گیٹ پر قتل ہونے والے ٹریفک وارڈن توصیف کے قتل کا مقدمہ مقامی تھانے میں درج کرلیا گیا، مقتول کے بچوں کے تعلیمی اخراجات محکمہ پولیس ادا کرے گا ۔
تفصیلات کے مطابق گزشتہ روز لاہور میں ہونے والے توصیف نامی ٹریفک وارڈن کے قتل کا مقدمہ سیکٹر انچارج ممتاز صفدر کی مدعیت میں مقدمہ درج کرلیا گیا۔
اس حوالے سے پولیس ترجمان کا کہنا ہے کہ وارڈن توصیف نے لاری اڈہ آؤٹ گیٹ پر اوورلوڈنگ پر بس کو روکا، ڈرائیور نے گاڑی روکنے کی بجائے وارڈن توصیف پر چڑھا دی۔
حادثے کے نتیجے میں ٹریفک وارڈن کی پسلیاں ٹوٹ کر دل میں دھنس گئیں تھیں جس کے سبب وارڈن نے موقع پر جان دے دی۔
سی ٹی او لاہور منتظر مہدی نے شہید وارڈن کے اہلخانہ سے اظہارِ تعزیت کرتے ہوئے اہلخانہ کو بچوں کی تعلیم و دیگر واجبات کی فوری ادائیگی کی یقین دہانی کرائی ہے۔ انہوں نے کہا کہ وارڈن انتہائی ایماندار، فرض شناس اور پروفیشنل تھا۔
شہید وارڈن توصیف کے سوگواران میں بیوی، 02 بیٹے اور 02 بیٹیاں شامل ہیں۔ شہید ماچس فیکٹری شاہدرہ لاہور کا رہائشی تھا۔ ذرائع کے مطابق شہید وارڈن کی نماز جنازہ کل بعد از نماز جمعہ ادا کی جائیگی۔
