کراچی: چیف جسٹس سندھ ہائی کورٹ عقیل احمد عباسی نے حکام کو ہدایت کی ہے کہ صوبے میں ایک ماہ کے اندر امن و امان یقینی بنایا جائے۔
سندھ ہائی کورٹ میں صوبے میں امن و امان سے متعلق اجلاس ختم ہوا جس میں چیف جسٹس عقیل احمد عباسی نے حکام سے 15 دن میں امن و امان سے متعلق رپورٹس طلب کر لیں۔
چیف جسٹس نے ہدایت کی کہ کوئی کتنا طاقتور کیوں نہ ہو رعایت نہ برتی جائے، امن و امان خراب کرنے والے جتنے بھی طاقتور ہوں انجام تک پہنچایا جائے۔
اجلاس کے بعد آئی جی سندھ غلام نبی میمن نے بتایا کہ سندھ ہائی کورٹ میں امن و امان اجلاس میں اسٹریٹ کرائمز، سیف سٹی اور کچے کے ڈاکوؤں کا مسئلہ ایجنڈے میں تھا، چیف جسٹس نے بریفنگ لی اور ہدایات جاری کیں۔
آئی جی سندھ کے مطابق عدالتی احکامات پر جو عمل درآمد ہوا اس پر بھی بریفنگ دی گئی، کراچی میں اسٹریٹ کرائمز روکنے کیلیے گشت بڑھانے پر بات ہوئی ہے۔
انہوں نے کہا کہ فوجداری نظام انصاف میں کئی چیزوں کو بہتر کرنے کی ضرورت ہے، اجلاس میں ہم نے اپنی گزارشات رکھیں اور تجاویز دیں۔
ان کا کہنا تھا کہ اجلاس میں تفتیش کے حوالے سے اہم نکات پر گفتگو کی گئی، یقینی بنایا جائے گا کہ جھوٹے مقدمات نہیں بنیں اس طرح بوجھ بھی کم ہوگا۔
اجلاس میں ڈی جی رینجرز، آئی جی سندھ، ایس ایس پی گھوٹکی، ڈی آئی جی لاڑکانہ اور دیگر متعلقہ حکام شریک ہوئے تھے۔
