اسلام آباد : سپریم کورٹ میں نئے ججز کی تعیناتی کے خلاف وکلاء کے احتجاج کے پیش نظر سپریم کورٹ کے باہر سکیورٹی سخت کر دی گئی۔
تفصیلات کے مطابق سپریم کورٹ میں نئے ججز کی تعیناتی کے لئے جوڈیشل کمیشن کا اجلاس آج ہوگا۔
وکلا کے احتجاج کے اعلان پر سیکیورٹی کے غیر معمولی انتظامات کئے گئے ہیں، اسلام آباد ہائیکورٹ اورڈسٹرکٹ بارز کے وکلاء چھبیسویں آئینی ترمیم سے متعلق احتجاج کریں گے۔
اس موقع پر شہراقتدار اور سپریم کورٹ کے احاطے میں بھی پولیس کی بھاری نفری تعینات کردی گئی ہے۔
جناح انڈر پاس کنٹینرز لگا کر بند کر دیا گیا تاہم سپریم کورٹ جانے کیلئے صرف مارگلہ روڈ کھلا ہے ، جس کے باعث ٹریفک جام سے مارگلہ روڈ پرگاڑیوں کی لمبی قطاریں لگ گئی۔
ٹریفک پولیس نے وفاقی دارلحکومت بالخصوص ریڈ ذون میں ٹریفک کیلئےمتبادل راستے فراہم کئے ہیں، مارگلا روڈ ،سرائے عالمگیرروڈ، ایکسپریس وے سے ٹریفک کی روانی جاری ہے جبکہ عوام کو اس حوالے سخت مشکلات کاسامنا کرنا پڑرہا ہے
احتجاج کے باعث میٹروبس سروس بھی محدود کردی گئی ہے ، راولپنڈی تا اسلام آباد چلنے والی میٹرو بس سروس فیض احمد فیض تک چلائی جارہی ہے جبکہ کشمیرہائی وے تا پاک سیکریٹریٹ تک میٹروبس سروس بند رہے گی۔
خیال رہے سپریم کورٹ میں 8 نئے ججز کی تعیناتی سے متعلق اجلاس سپریم کورٹ کے کانفرس روم میں دن 2 بجے ہوگا، جوڈیشل کمیشن نے پانچوں ہائیکورٹس لاہور، کراچی، پشاور، اسلام آباد اور کوئٹہ کے سینئر ججز کے نام طلب کئے ہیں۔
اجلاس میں فیصلہ ہوگا کہ آیا یہ تقرریاں فوری کی جائیں گی یا مزید مشاورت درکار ہوگی۔
