ٹھٹھہ، سجاول اور ٹنڈو محمد خان کے بلدیاتی انتخابات کے مکمل غیر سرکاری وغیر حتمی نتائج آگئے جس کے مطابق پی پی نے مخالفین پر جھاڑو پھیر دیا۔
ٹھٹھہ ضلع میں پاکستان پیپلز پارٹی نے تنہا پرواز کرتے ہوئے یونین کونسل کی 40 نشستوں میں سے 38 نشستیں اڑا لیں۔ غیر سرکاری اور غیر حتمی نتائج کے مطابق ٹھٹھہ ضلع کی مجموعی طور پر 40 یونین کونسلوں میں سے صرف دو پر آزاد امیدوار فتح یاب ہونے میں کامیاب ہوئے باقی 38 یوسیز کے عوام نے تیر پر ٹھپہ لگا کر پی پی پر اعتماد کا اظہار کیا۔
ٹھٹھہ کی 5 ٹاؤن کمیٹیوں کے 23 وارڈز میں سے 21 پر فتح پیپلز پارٹی کے نام رہی۔ ٹاؤن کمیٹیوں کے 2 وارڈز پر آزاد امیدواروں نے کامیابی سمیٹی جب کہ ایک میونسپل کمیٹی میں سندھ کی حکمران جماعت نے کلین سوئپ کرتے ہوئے تمام 9 وارڈز میں کامیابی کو گلے لگایا۔
ضلع سجاول کی تمام 37 یونین کونسل کے بھی غیر سرکاری غیر حتمی نتائج آگئے۔ پیپلز پارٹی نے ضلع سجاول میں بھی اپنی فتح کے جھنڈے گاڑھے اور 35 یونین کونسلیں جیتنے میں کامیاب رہی۔ جمعیت علمائے اسلام اور آزاد امیدوار کو ایک ایک نشست ملی۔
سجاول کی 5 ٹاؤن کمیٹیوں کے 31 وارڈز میں سے 27 پیپلز پارٹی کے نام رہے۔ دو دو وارڈز پر جے یو آئی اور آزاد امیدواروں نے کامیابی سمیٹی۔
ضلع ٹنڈو محمد خان کی تمام یونین کونسلوں کے غیر سرکاری اور غیر حتمی نتائج کے مطابق 28 یوسیز میں سے 26 پر پیپلز پارٹی کامیاب رہی جب کہ جی ڈی اے اور پی ٹی آئی صرف ایک ایک نشست حاصل کر پائیں۔
ٹنڈو محمد خان کی 2 ٹاؤن کمیٹی کے 9 وارڈز میں سے 8 پر پی پی اور ایک پر آزاد امیدوار کامیاب رہا۔ ایک میونسپل کمیٹی کے 19 وارڈز میں سے 15 پی پی کے نام رہے جبکہ دو وارڈز پر آزاد امیدوار کامیاب ہوئے جب کہ ایس ٹی پی اور جی ڈی اے نے ایک ایک نشست پائی۔
ضلع بدین کی 64 میں سے 38 ٹاؤن کمیٹی میں سے30 پر پیپلز پارٹی کامیاب رہی ہے۔ 6 پر آزاد امیدوار جب کہ جی ڈی اے 2 نشستیں حاصل کرنے میں کامیاب رہی ہے۔
ضلع دادو کی 66 یونین کونسل میں سے 59 پر پیپلز پارٹی کامیاب ہوچکی ہے۔ 4 ٹاؤن کمیٹیوں کے 26 وارڈز میں سے 24 پر پیپلز پارٹی اور2 پر پی ٹی آئی کامیاب رہی ہے۔ چار میونسپل کمیٹیوں کے 57 وارڈز میں سے 50 کے موصولہ غیر سرکاری اور غیر حتمی نتائج کے مطابق پی پی 34 پر کامیاب ہوکر پہلے نمبر پر ہے۔ پی ٹی آئی نے 14 پر فتح حاصل کی ہے جب کہ دو وارڈز پر آزاد امیدوار کامیاب ہوئے ہیں۔
ضلع جامشورو کی 30 میں سے 26 ٹاؤن کمیٹی کے نتائج سامنے آگئے۔ 18 نشستوں پر پی پی نے فتح حاصل کی جب کہ تین پر آزاد امیدوار کامیاب ہوئے ہیں۔
یہ بھی پڑھیں: کراچی کے 4 اضلاع کے غیر سرکاری غیر حتمی نتائج، پی پی سب سے آگے
ٹنڈوالہیار کی 5 ٹاؤن کمیٹی کے 27 وارڈز میں سے 24 پر پی پی اور تین پر آزاد امیدوار جیتے ہیں۔ ایک میونسپل کمیٹی کے 22 وارڈز میں سے 15 پر پی پی پی نے فتح کی مہر لگائی۔ تین وارڈز پر پی ٹی آئی کامیاب رہی جب کہ ٹی ایل پی اور آزاد امیدوار کے ہاتھ دو دو نشسیں آئی ہیں۔
