تہران: لبنان میں ایرانی سفارت خانے نے خبردار کیا ہے کہ اسرائیل کے حملے نے ’’گیم رولز چینج‘‘ کر دیے ہیں، اسرائیل کو اس کی سزا دی جائے گی۔
غیر ملکی میڈیا رپورٹس کے مطابق بیروت میں ایرانی سفارت خانے نے سماجی رابطوں کی ویب سائٹ X پر اپنے اکاؤنٹ سے لکھا کہ اسرائیلی حکومت نے ایک بار پھر خوں ریز قتلِ عام کا ارتکاب کیا ہے اور اسرائیل گنجان آباد رہائشی علاقوں کو نشانہ بنا کر اپنے وحشیانہ جرائم کو چھپانے کے لیے جھوٹے جواز پیش کر رہا ہے۔
سفارت خانے کا کہنا تھا کہ اس میں کوئی شک نہیں ہے کہ یہ قابلِ مذمت جرم اور غیر ذمہ دارانہ رویہ ایک سنگین بگاڑ کی نشان دہی کرتا ہے، جو کھیل کے قواعد کو بدلنے کے مترادف ہے۔
ادھر بیروت حملے کے بعد ایرانی سپریم لیڈر آیت اللّٰہ خامنہ ای نے نیشنل سیکیورٹی کونسل کا ہنگامی اجلاس طلب کر لیا ہے، خامنہ ای کے مشیر علی لاریجانی نے کہا کہ اسرائیل نے سرخ لکیر عبور کر دی ہے، صورت حال انتہائی سنگین ہو چکی۔ انھوں نے یہ بھی کہا کہ حزب اللّٰہ کے سربراہ کی ہلاکت کی صورت میں متبادل قیادت تحریک کو چلانے کے لیے تیار ہے۔
حسن نصر اللہ سے متعلق ایرانی میڈیا کا بڑا دعویٰ
امریکی وزیر خارجہ انٹونی بلنکن نے مشرق وسطیٰ کا تنازع مذاکرات سے حل کرنے کی ضرورت پر زور دیا، اور کہا کہ فریقین جو انتخاب کریں گے اسی سے خطے کے مستقبل کا تعین ہوگا، اور اس سے خطے کے لوگوں پر گہرے اثرات ہوں گے۔
آسٹریلوی وزیر خارجہ نے جنرل اسمبلی کے اجلاس میں کہا کہ لبنان کو غزہ نہیں بننے دے سکتے، گزشتہ روز سلامتی کونسل کے اجلاس میں سیکریٹری جنرل انتونیو گوتریس نے غزہ اور لبنان میں فوری جنگ بندی کا مطالبہ کیا ہے۔
