بیروت: غزہ کے بعد صہیونی فورسز نے لبنان پر وحشیانہ بمباری شروع کر دی ہے، لبنان کی ایک دل دہلا دینے والی ویڈیو سامنے آئی ہے، جس میں دکھایا گیا ہے کہ عین اس وقت خوفناک دھماکا ہوا جب ایک صحافی لائیو انٹرویو کے لیے تیار ہو گیا تھا۔
لبنان کے صحافی فادی بودایا نے سوشل میڈیا پر ایک پوسٹ میں یہ خوفناک ویڈیو شیئر کرتے ہوئے بتایا کہ وہ لائیو انٹرویو کی تیاری کر رہے تھے کہ اچانک ان کے گھر پر میزائل حملہ ہو گیا، ویڈیو میں دیکھا جا سکتا ہے کہ زوردار دھماکا ہوتا ہے اور سب کچھ دہل جاتا ہے۔
صحافی فادی بودایا ’میرا انٹرنیشنل نیٹ ورک‘ کے چیف ایڈیٹر ہیں، انھوں نے ویڈیو ایکس پر شیئر کی جو وائرل ہو گئی، ان کے گھر کا ایک حصہ میزائل کی زد پر آ گیا تھا، دھماکے میں فادی بودایا خوش قسمتی سے بچ گئے تھے۔
ویڈیو میں دیکھا جا سکتا ہے کہ آغاز میں فادی بودایا پرسکون انداز میں انٹرویو کر رہے ہیں، جب اچانک ان کے گھر پر میزائل گرتا ہے، وہ یہ انٹرویو اسکائپ کے ذریعے کر رہے تھے، حادثے کے بعد بہت سے لوگوں نے فادی بودایا کی خیریت جاننے کی کوشش کی، حملے کے کچھ دیر بعد انھوں نے ٹوئٹر پر اپنی خیریت کی اطلاع دی۔
