لاہور : لاہور ہائی کورٹ نے ایف آئی اے اور پولیس کو اداکارہ صوفیہ مرزا کو ہراساں کرنے سے روکتے ہوئے درخواست نمٹا دی۔
تفصیلات کے مطابق لاہورہائیکورٹ میں عمر فاروق کی جانب سے سابق اہلیہ صوفیہ مرزا کو ہراساں کرنے کے کیس کی سماعت ہوئی۔
لاہور ہائی کورٹ کے جسٹس انوارالحق پنوں نے سماعت کی، اداکارہ صوفیہ مرزا کے وکیل چوہدری عدنان کلار نے دلائل دئیے کہ عمر فاروق کے ساتھ بچیوں کی حوالگی کا کیس چل رہا ہے پیروی سے باز نہ آنے پر دھمکایا جا رہا ہے۔
وکیل کا کہنا تھا کہ عمر فاروق کے ایماء پر پولیس اور ایف آئی اے سابق اہلیہ کے گھر پر چھاپے مار رہی ہے،عمر فاروق محکمہ امیگریشن کی ملی بھگت سے بچیوں کو بیرون ملک لے گیا ہے۔
چوہدری عدنان کلار نے بتایا کہ عدالت نے عمر فاروق کے ناقابل ضمانت وارنٹ گرفتاری جاری کرتے ہوئے عدالتی اشتہاری بھی قرار دے رکھا ہے جبکہ نادرا نے ملزم کا شناختی کارڈ عدالتی حکم کی روشنی میں بلاک کر رکھا ہے۔
وکیل نے استدعا کی عدالت پولیس کو ہراساں کرنے سے روکنے کے احکامات صادر کرے۔
تھانہ کیولری گراونڈ کے ایس ایچ او نے جواب داخل کرواتے ہوئے بتایا کہ پولیس صوفیہ مرزا کو ہراساں نہیں کررہی نہ ہی اس کے خلاف کوئی درخواست ہے۔
عدالت نے ایف آئی اے اور پولیس کو حراساں کرنے سے روکتے ہوئے درخواست نمٹا دی۔
