فلوریڈا: ملک کی خاطر ناقابل فراموش کردار ادا کرنے والے قومی ہیروز کے لئے ننھا بچہ میدان عمل میں آگیا ہے۔
بین الاقوامی میڈیا رپورٹ کے مطابق ریاست فلوریڈا سے تعلق رکھنے والے بارہ سالہ زیکریا کارلٹیج ملک کی خاطر ناقابل فراموش خدمات سر انجام دینے والے رضاکاروں کے لئے فنڈ ریزنگ کررہا ہے، اس مقصد کے لئے بارہ سالہ بچہ ایک میل دوڑ لگاتا ہے، اس دوران جمع ہونے والی رقم کو وہ ان رضاکاروں کو دیتا ہے، جنہوں نے امریکا کے لئے جانوں کا نذرانہ دیا یا کسی ناخوش گوار واقعے میں زخمی ہوئے۔
زیکریا کارلٹیج نے یہ سلسلہ دو ہزار انیس سے شروع کررکھا ہے، اب تک یہ ننھا اسٹار سات سو میل کی مسافت طے کرچکا ہے، اس دوران وہ بیس ہزار ڈالر کی خطیر رقم بھی جمع کرچکا ہے، یہ رقم وہ قانون نافذ کرنے والے اہلکاروں کو خراج عقیدت کے طور پر پیش کررہا ہے۔
گذشتہ ہفتے زیکریا نے کیلیفورنیا ہائی وے پر زخمی ہونے والے پیٹرولنگ آفیسر ڈیوڈ گورڈن کو ان کی خدمات پر 5000 ڈالر کا چیک دیا تھا۔
اس انوکھی مہم سے متعلق کارلٹیج کا کہنا تھا کہ مجھے ڈور لگانے کے دوران جو پیسے ملتے ہیں، میں انہیں اپنے جوانوں جو کہ ملک کی خاطر اپنی جان داؤ پر لگاتے ہیں ، ان کی مدد کرتا ہوں ، مجھے اس سے راحت حاصل ہوتی ہے۔
ننھے بچے کا یہ قابل ستائش کارنامہ سوشل میڈیا پر بھی وائرل ہوچکا ہے، جس کے بعد کارلیٹیج کے اس عمل کو بہت پسند کیا جارہا ہے۔
