ہارون آباد: مضرصحت لسی پینے سے تین مختلف گھروں کے 12سے زائد افراد کی حالت غیر ہو گئی، بتایا جارہا ہے کہ لسی میں چھپکلی کا زہر شامل ہوگیا تھا۔
تفصیلات کے مطابق ہارون آباد کے قریبی علاقہ چک کھیترنوالی میں ایک گھر کی چاٹی والی لسی میں چھپکلی گر گئی اور اس کا زہر لسی میں شامل ہوگیا ، لسی پینے سے 12 سے زائد افراد بیمار ہوکر اسپتال روانہ ہوگئے۔
ذرائع کا کہنا ہے کہ بیمار ہونے والوں میں دو بچے ، بوڑھے اور عورتیں شامل ہیں۔ ایک شخص کو کھاٹاں کی سرکاری ڈسپنسری میں جبکہ متعددکو ٹی ایچ کیو اسپتال داخل کروا دیا گیا ہے ۔
ٹی ایچ کیو اسپتال میں کوالفائیڈ ڈاکٹروں کی زیر نگرانی مریضوں کی دیکھ بھال جاری ہے ، ڈاکٹروں کی جانب سے ایک بزرگ کی حالت تشویشناک بیان کی جاتی ہے۔
یاد رہے کہ چھپکلی رینگنے والے کیڑوں کے گروہ کا ایک بڑی تعداد میں پایا جانے والا رکن ہے، جس کی پانچ ہزار اقسام ہیں اور یہ براعظم انٹارکٹیکا کے علاوہ سارے براعظموں میں پایا جاتا ہے۔
عموماً گھروں میں پائی جانے والی چھپکلی زہریلی نہیں ہوتی لیکن کبھی کبھار گھروں میں اس کی زہریلی قسم بھی مشاہدے میں آتی ہے جیسا کہ اوپر بیان کی گئی صورتحال میں ہوا ہے۔
گرمی کے موسم میں چھپکلیاں اور دیگر کیڑے مکوڑے اپنے بِلوں سے باہر آجاتے ہیں اور دروازے کی چوکھٹیں، بیت الخلا اور کچن رہنے کے لیے ان کی پسندیدہ جگہ ہے۔کچھ لوگ چھپکلی سے بے پناہ ڈرتے بھی ہیں۔ چھپکلی کے ڈر کی یہ کیفیت ہرپیٹو فوبیا کہلاتی ہے۔
