کراچی: پاکستان تحریک انصاف کراچی ڈویژن کے صدر راجہ اظہر نے ایک خط میں صوبائی اور وفاقی حکومتوں کو لوڈ شیڈنگ کی طرف متوجہ کرایا ہے، کہ کراچی میں بچوں کے امتحانات پھر شروع ہو گئے ہیں حکومت لوڈشیڈنگ کے عذاب سے امتحانی مراکز اور عوام کی جان چھڑائے۔
وزیر اعظم شہباز شریف، وزیر اعلیٰ سندھ مراد علی شاہ، سی ای او کے الیکٹرک سید مونس عبداللہ علوی، اور وفاقی وزیر توانائی اویس احمد خان لغاری کے نام لکھے گئے خط میں راجہ اظہر نے کہا لوڈ شیڈنگ قصداً کی جا رہی ہے، امتحانات دینے والے بچے سخت مایوسی کا شکار ہیں۔
انھوں نے لکھا کراچی والوں کی زندگی کو مسلسل ڈراؤنے خواب اور اذیت میں بدل دیا گیا ہے، موجودہ حالات کی مکمل ناکامی وفاقی و صوبائی حکومت کے سر ہے، ہمارے بچوں کے تعلیمی مراکز اندھیروں میں ڈوبے ہوئے ہیں، علم کے یہ ننھے چراغ کیسے جلیں گے اگر ان کی اعصابی حالت ہی ٹھیک نہیں ہوگی۔
راجہ اظہر کا کہنا تھا کہ یہ رویہ غیر انسانی اور غیر اخلاقی ہے، اسے برداشت نہیں کیا جا سکتا، عوام پہلے ہی احتجاج کر چکے ہیں لیکن کے الیکٹرک پر ہماری شکایتوں کا کوئی اثر نہیں ہو رہا، کراچی کے نوجوانوں کے ساتھ یہ غفلت مجرمانہ ہے، ہمارے بچوں کے مستقبل اور تعلیم کو پامال کیا جا رہا ہے۔
انھوں نے کہا کراچی کے باسیوں کے حقوق کے وقار کو یہ براہ راست چیلنج ہے، کراچی کے عوام کے الیکٹرک کے خلاف بھرپور احتجاج کے لیے تیار ہیں، ہمارا مطالبہ کہ لوڈ شیڈنگ فوری طور پر ختم کی جائے ورنہ عوامی قوت کے ساتھ سامنا کرنے کے لیے تیار رہیں۔
