لاہور: صوبہ پنجاب میں بجلی کا مجموعی شارٹ فال 6 ہزار میگا واٹ پر پہنچ گیا، مختلف شہروں میں 6 سے 10 گھنٹے جبکہ دیہات میں 12، 12 گھنٹے لوڈ شیڈنگ ہو رہی ہے۔
تفصیلات کے مطابق صوبہ پنجاب کے مختلف شہروں میں 6 سے 10 گھنٹے لوڈ شیڈنگ جاری ہے۔
ذرائع کا کہنا ہے کہ صوبے میں بجلی کی طلب 25 ہزار 500 میگا واٹ کے لگ بھگ ہے جبکہ پیداوار 18 ہزار 700 میگا واٹ کے لگ بھگ ہے۔ بجلی کا مجموعی شارٹ فال 6 ہزار میگا واٹ ہے۔
ذرائع کے مطابق دیہات میں 12، 12 گھنٹے لوڈ شیڈنگ ہو رہی ہے۔
صوبائی دارالحکومت لاہور کو بجلی کے تقسیم کار ادارے لیسکو میں بجلی کا شارٹ فال 600 میگا واٹ سے زائد ہے، شہر میں 2 سے 3 گھنٹے لوڈ شیڈنگ کی جارہی ہے۔
ذرائع کے مطابق پاور پلانٹس کو گیس اور تیل کی کمی کا سامنا ہے، صلاحیت موجود ہے لیکن وسائل کم ہیں، جونہی تیل اور گیس ملے گی لوڈ شیڈنگ کم ہوجائے گی۔
