کراچی : ملیرکورٹ نے پی ٹی آئی رہنما علی زیدی کی ضمانت منظور کرتے ہوئے دس ہزار روپے کے مچلکے جمع کروانے کا حکم دے دیا۔
تفصیلات کے مطابق ملیر کورٹ میں فراڈ اور دھمکانے کے کیس میں پی ٹی آئی رہنما علی زیدی کی درخواست ضمانت پر سماعت ہوئی۔
عدالت نے پی ٹی آئی رہنما علی زیدی کی ضمانت منظور کرلی اور دس ہزار روپے کے مچلکے جمع کروانے کا حکم دے دیا۔
اس سے قبل فراڈ اور دھمکانے کے کیس میں جج احمد علی گبول نے علی زیدی سے مکالمہ کی اکہ آپ کے ساتھ کوئی ناروا سلوک تو نہیں کیا گیا۔
جس پر علی زیدی نے کہا کہ نہیں میرے ساتھ کوئی ناروا سلوک نہیں کیا گیا ،تفتیش کے دوران میں نے جو دستاویزات پیش کئے ہیں انہیں قبول نہیں کیا جا رہا۔
مدعی مقدمہ کے وکیل کامران بلوچ کا کہنا تھا کہ میرے موکل نے کہا ہے کہ ہم آؤٹ آف کورٹ سیٹلمنٹ کریں گے۔
جس پر علی زیدی کے وکیل خالد محمود نے جواب دیا ہم کوئی آؤٹ آف کورٹ سیٹلمنٹ نہیں کر رہے، عدالت نے جسمانی ریمانڈ کی استدعا مسترد کرتے ہوئے جوڈیشل ریمانڈ پر جیل بھیجنے کا حکم دیا۔
عدالت نے تفتیشی افسر کو آئندہ سماعت پر چالان پیش کرنے کا حکم بھی دیا۔
عدالت کےباہرمیڈیا سے گفتگومیں وکیل ڈاکٹر شہاب امام نے کہا علی زیدی پر جعلی مقدمہ بنایا گیا، امید ہے عدالت سے انصاف ملے گا۔
