کراچی : سندھ میں بلدیاتی الیکشن کا دوسرے مرحلے کی تیاریاں حتمی مراحل میں داخل ہوگئیں، الیکشن کمیشن نے سندھ حکومت سے ٹرانسپورٹیشن پلان مانگ لیا۔
اس حوالے سے ذرائع کا کہنا ہے کہ صوبے کے 16اضلاع میں بلدیاتی الیکشن کے لیے پولنگ24جولائی کو شیڈول ہے۔
کراچی اور حیدرآباد کے علاوہ اندرون سندھ کے شہروں دادو، جامشورو، ٹھٹھہ، سجاول اور دیگراضلاع میں بلدیاتی الیکشن کیلئے پولنگ ہوگی۔
ذرائع کے مطابق الیکشن کمیشن کی جانب سے چیف سیکریٹری سندھ کو لکھے گئے خط میں انتخابات کے انعقاد کیلئے5ہزار سے زائد گاڑیوں کا مطالبہ کیا گیا ہے۔
الیکشن کمیشن نے انتخابات کے دوسرے مرحلے کے لیے14جولائی تک ٹرانسپورٹیشن پلان دینے کی ہدایت دی ہے۔ انتخابی سامان وعملے کی پولنگ اسٹیشنز تک ترسیل کے لیے گاڑیاں درکار ہوں گی۔
ذرائع کے مطابق سندھ میں دوسرے مرحلے میں بلدیاتی الیکشن کے لیے9ہزار پولنگ اسٹیشن بنائے جارہے ہیں، کراچی کے7اضلاع میں بلدیاتی الیکشن کےلیے5ہزار پولنگ اسٹیشن ہونگے۔
الیکشن کمیشن کی جانب سے تمام ڈی آر اوز کو مراسلہ ارسال کیا گیا ہے جس میں کہا گیا ہے کہ پولنگ اسٹیشن سے مقررہ حد کے فاصلے پر انتخابی کیمپ قائم کرنے کی اجازت دی جائے۔
