لاہور: پاکستان مسلم لیگ ن کے صدر میاں شہباز شریف نے مشترکہ مفادات کونسل کے فوری اجلاس اور کرونا سے نمٹنے کے لیے لوکل گورنمنٹ بحال کرنے کا مطالبہ کر دیا۔
اے آر وائی نیوز کے مطابق شہباز شریف نے کرونا سے اموات اور متاثرین کی تعداد میں اضافے پر اظہار پریشانی کرتے ہوئے کہا ہے کہ خود فریبی کی بجائے مشترکہ مفادات کونسل کا فوری اجلاس بلایا جائے۔
اپنے بیان میں اپوزیشن لیڈر نے کہا کہ ڈاکٹرز، انتظامی، سیاسی و عسکری ذمہ داران مل کر مشترکہ حکمت عملی بنائیں، این سی او سی میں ملک کے نامور طبی ماہرین کو شامل کیا جائے، اور ان کی رائے کی روشنی میں انتظامی اقدامات کیے جائیں۔
شہباز شریف نے مطالبہ کیا کہ وفاق اور صوبے مل کر مشترکہ حکمت عملی مرتب کریں، کیوں کہ وبا کی صورت حال ہاتھ سے نکلتی جا رہی ہے، میں پھر کہتا ہوں کہ لوکل گورنمنٹ بحال کی جائے، کرونا سے نمٹنے میں یہ عوامی ادارہ بہت کارگر ثابت ہو سکتا ہے۔
چین کی کرونا میں مبتلا شہباز شریف کو ایک بار پھر علاج کی پیشکش
انھوں نے کہا لاک ڈاؤن مسئلے کا حل نہیں تو حکومت کی متبادل حکمت عملی کیا ہے؟ حکومت بیانات کی بجائے کرونا کے علاج اور احتیاط کے لیے انتظامی زور دکھائے، بر وقت مناسب تیاری کے بغیر لاک ڈاؤن اور پھر نرمی خطرناک ثابت ہوئی۔
شہباز شریف نے مزید کہا کہ حکومت جو دعوے کر رہی ہے زمین پر حقائق اس کے برعکس ہیں، مریض اسپتالوں کے صحن اور راہداریوں پر علاج کے لیے تڑپ رہے ہیں۔
