لندن: لوٹن ایئرپورٹ پرخوفناک آتشزدگی کے باعث تمام پروازیں معطل کردی گئیں، حکام کا کہنا ہے کہ آگ کار پارک میں لگی، ایمرجنسی سروسز موقع پر پہنچ گئیں۔
غیر ملکی ذرائع ابلاغ کے مطابق آتشزدگی کے باعث افراتفری کی صورتحال پیدا ہوگئی، سوشل میڈیا پر موجود فوٹیج میں آگ کے شعلے دکھائی دے رہے ہیں۔
رپورٹ کے مطابق 10 فائر انجن آگ پر قابو پانے میں مصروف ہیں، جبکہ ایمبولینس سروس بھی موقع پر پہنچ گئی ہے، کسی کے زخمی ہونے کی اطلاع نہیں۔
فائر بریگیڈ حکام کا کہنا ہے کہ آتشزدگی نے کار پارک کا 80 فیصد حصہ متاثر کیا ہے، جبکہ ایئرپورٹ انتظامیہ نے شہریوں کو ایئرپورٹ نہ آنے کی ہدایت کردی ہے۔
دوسری جانب کراچی ایئرپورٹ پر ناکارہ طیارے کھڑے کھڑے کباڑ میں تبدیل ہوگئے، شاہین ایئر لائن کے مالکان واجبات ادا کیے بغیر ملک سے چلے گئے۔
شاہین ایئر لائن کے درجنوں گراؤنڈ کیے گئے طیارے کئی برس سے کراچی ایئرپورٹ پر کھڑے کھڑے کباڑ بن چکے ہیں، ایئرپورٹ پر کھڑے طیاروں سے پرزہ جات چوری بھی ہوگئے ہیں۔
کسٹمز اور سی اے اے کے واجبات کی عدم ادائیگی کے باعث گراؤنڈ کیے گئے ناکارہ طیارے پرندوں کی آماجگاہ بن گئے جس کی وجہ سے ایئر پورٹ آنے اور جانے والے جہازوں کے لئے بھی خطرہ پیدا ہوگیا ہے۔
