موجودہ حکومت کے خلاف پاکستان تحریک انصاف کا ” حقیقی آزادی مارچ” کے سلسلے میں پنجاب کے بعد سندھ میں بھی لوگوں کی بڑی تعداد سڑکوں پر نکل آئی۔
اس حوالے سے سندھ کے شہر مٹیاری میں پی ٹی آئی کے کارکنان اپنے چیئرمین کی ہدایت پر حکومت کیخلاف سراپا احتجاج ہیں۔
سندھ پولیس نے صورتحال کو کنٹرول کرنے کیلئے پی ٹی آئی رہنماؤں کیخلاف کریک ڈاؤن شروع کردیا، پولیس نے مقامی صدر اویس گل سمیت20کارکنان کو گرفتار کرکے لاک اپ کردیا۔
پی ٹی آئی مٹیاری کے مقامی رہنما اویس گل میمن نے کہا کہ جیل اور ہتھکڑیوں سے نہیں ڈرتے، عمران خان کیلئے جان دینے سے بھی گریزنہیں کریں گے۔
واضح رہے کہ موجودہ حکومت کے خلاف پاکستان تحریک انصاف کا ” حقیقی آزادی مارچ” پشاور سے شروع ہوگیا ہے، چیئرمین پی ٹی آئی عمران خان کی قیادت میں تاریخی مارچ آج اسلام آباد کے لئے روانہ ہوگا۔
چیئرمین پی ٹی آئی کا اہم پیغام
چیئرمین پی ٹی آئی عمران خان نے اپنے ویڈیو پیغام میں کہا ہے کہ ہمارا ایک مقصد ہے الیکشن کرائیں اور اسمبلی تحلیل کریں، ہم اگر اب نہیں نکلیں گے تو ہماری آئندہ نسلیں ہمیں معاف نہیں کریں گی، قوم سے اپیل ہے کل ہمیں موقع مل رہا ہے اس کو ضائع نہ ہونے دیں۔
