لکھنؤ : بھارت میں منچلے نوجوانوں کو اپنے دوست کی سالگرہ سڑک پر منانا مہنگا پڑگیا، پولیس نے پانچ نوجوانوں کو انوکھی سزا دے ڈالی۔
سالگرہ کی خوشیاں منانا سب کا حق ہوتا ہے اور لوگ ان لمحات کو یادگار بنانے کیلئے نت نئے انداز اختیار کرتے ہیں لیکن اپنی خوشی منانا کبھی کبھی دوسروں کیلئے زحمت کا باعث بھی بن جاتا ہے۔
بھارتی ریاست اترپردیش کے شہر لکھنؤ کے کچھ منچلے نوجوانوں نے اپنے دوست کی سالگرہ کا اہتمام بڑے دھوم دھام سے کیا جس کے بعد رنگ میں بھنگ پڑگیا جس کی ویڈیو سوشل میڈیا پر وائرل ہوگئی۔
بھارتی میڈیا کے مطابق یہ واقعہ جمعہ کی رات کو پیش آیا جب پانچ نوجوانوں کا ایک گروپ مشہور چوراہے پر جمع تھا اور آپس میں ہنسی مذاق میں مصروف تھا۔
ہوا کچھ یوں کہ ان نوجوانوں نے سالگرہ کا کیک لکھنؤ کی مصروف شاہراہ کے درمیان کاٹا جس سے ٹریفک میں خلل پیدا ہوا یہی نہیں ان نوجوانوں نے ایک دوسرے پر کیک کے ٹکڑے پھینک کر بھی مارے۔
Celebrated the birthday by cutting the cake in the middle of the road, by spreading the cake at crossroads, the inspector got it cleaned.#ViralVideos #Lucknow #cake #cleaned #Ranjithame #InltToWinlt pic.twitter.com/LziDijzW0a
— NewsNowNation (@NewsNowNation) November 5, 2022
اس تمام صورتحال میں بات اس قدر بگڑی کہ مقامی پولیس کو مداخلت کرنا پڑی، اور پولیس نے اپنا راویتی انداز اپناتے ہوئے ان نوجوانوں کو انوکھی سزا دے ڈالی۔
ایک دوسرے پر کیک پھینکنے سے کیک کے ٹکڑے سڑک کے درمیان پڑے رہے اور پیروں تلے آگئے پولیس اہلکاروں نے پانچوں نوجوانوں کو پکڑ ان سے پوری سڑک صاف کروائی۔
سوشل میڈیا پر وائرل ہونے والی ویڈیو پر صارفین پولیس کے اس قدام کی حمایت کررہے ہیں اور دلچسپ تبصرے بھی کررہے ہیں۔
