ہالی ووڈ کی چینی نژاد اداکارہ لوسی لیو کا نام واک آف فیم پر درج ستاروں میں شامل کرلیا گیا۔ وہ 60 سال بعد واک آف فیم میں شامل ہونے والی پہلی ایشیائی نژاد اداکارہ ہیں۔
لوسی لیو سے 60 سال قبل یہاں جگہ پانے والی پہلی ایشیائی اداکارہ انا مے وونگ تھیں جنہوں نے خاموش فلموں میں کئی اہم کردار ادا کیے۔ وونگ کو ہالی ووڈ کی پہلی چینی نژاد اداکارہ ہونے کا اعزاز بھی حاصل ہے۔
اب اس کے 60 برس بعد ایک اور ایشیائی اداکارہ کا نام یہاں درج کیا گیا ہے۔ لوسی کے نام کے ستارے کو وونگ کے برابر میں ہی جگہ دی گئی ہے۔
لوسی لیو نے 90 کی دہائی میں ’ایلے مک بیل‘ نامی سیریز سے اپنے ہالی ووڈ کیریئر کا آغاز کیا۔ انہوں نے چارلیز اینجلز، کل بل اور ایلیمنٹری نامی سیریز میں بھی اہم کردار ادا کیے۔
اس موقع پر منعقدہ تقریب میں لوسی کا کہنا تھا کہ واک آف فیم میں اپنا نام شامل ہونے سے زیادہ خوشی انہیں اس بات کی ہے کہ ان کے نام کو وونگ کے برابر میں جگہ دی گئی۔ ’وہ نسل پرستی کے باوجود اپنے آپ کو منوانے میں کامیاب رہیں اور نئے آنے والوں کے لیے بھی مشعل راہ ثابت ہوئیں‘۔
انہوں نے کہا کہ انہیں یہاں ایشیائی ہونے کی وجہ سے ایک منفرد مقام حاصل ہے تاہم ایسا انہیں ہے کہ ایشیا اس صنعت میں پیچھے ہے۔ ’وونگ، بروس لی اور مجھ سمیت کئی ایشیائی فنکار مشرق اور مغرب کو ملانے والے پلوں کا کردار ادا کر رہے ہیں‘۔
لوسی کے اعزاز میں منعقد کی جانے والی تقریب میں ہالی ووڈ کے دیگر فنکاروں نے بھی شرکت کی اور لوسی کو مبارکباد دی۔
