پرتگالی حکام نے جرمن پولیس کی مدد سے 15 سال قبل 2007 میں لاپتہ ہونے والی 3سالہ برطانوی بچی میڈیلین میک کین کی تلاش کا عمل دوبارہ شروع کردیا ہے۔
اس حوالے سے پولیس کو جرمنی میں ایک مشتبہ ملزم کے بارے میں معلومات حاصل ہوئی ہیں جس کے بارے میں کہا جارہا ہے کہ مذکورہ جرمن باشندہ کرسچن بروکنر لاپتہ بچی میڈلین میک کین کی گمشدگی میں براہ راست ملوث ہے۔
غیرملکی خبر رساں ادارے کی رپورٹ کے مطابق ایک عینی شاہد نے میڈیا کو بتایا ہے کہ پولیس افسران نے ساحل کے قریب ایک سنسان و بیابان علاقے کے تالاب میں بچی کی باقیات کو تلاش کیا جہاں ان کو شبہ ہے کہ وہ بچی یہی لاپتہ ہوئی تھی اور یہیں اسے آخری بار دیکھا گیا تھا۔
ذرائع کے مطابق سلوز میونسپلٹی میں کیا جانے والا یہ پولیس آپریشن جرمن حکام کی درخواست پر کیا جا رہا ہے۔ تاہم پرتگالی پولیس کو اس کیس میں کسی اہم پیش رفت کی کوئی خاص امید نہیں ہے۔
واضح رہے کہ 43 سالہ ملزم کرسچن بروکنر ایک سزا یافتہ مجرم ہے جو اس وقت بچوں کے ساتھ بدسلوکی، منشیات فروشی اور جرمنی میں ایک 72سالہ خاتون کی عصمت دری کرنے کے مقدمات میں جیل کی سلاخوں کے پیچھے ہے۔
میڈلین میک کین کیس کی تفتیش کے دوران ملزم بروکنر نے واقعے میں خود کے کسی بھی طرح ملوث ہونے سے انکار کیا ہے اور پراسیکیوٹر کی جانب سے بھی اس پر باضابطہ طور پر کسی جرم کا الزام عائد نہیں کیا گیا ہے۔
