واشنگٹن : لوزیانا کی امیگریشن عدالت نے کولمبیا یونیورسٹی کے گرین کارڈ ہولڈر طالب علم محمود خلیل کی ملک بدری کا حکم جاری کردیا۔
امریکی عدالت نے فلسطینیوں کے حق میں مظاہرے کرنے والے شامی طالب علم سے متعلق فیصلہ جاری کرتے ہوئے کہا ہے کہ محمود خلیل کو ان کے نظریات کی بنیاد پر ملک بدر کیا جا سکتا ہے۔
غیر ملکی خبر رساں ادارے کی رپورٹ کے مطابق امریکی وزیر خارجہ مارکو روبیو نے اسرائیل مخالف مظاہروں کی قیادت پر طالب علم کا گرین کارڈ منسوخ کردیا تھا۔
جس کے بعد امریکی محکمہ خارجہ اور ہوم لینڈ سیکیورٹی نے محمود خلیل کی ملک بدری کا نوٹس جاری کیا تھا، کولمبیا یونیورسٹی کے طالب علم نے اپنی ملک بدری کو عدالت میں چیلنج کر رکھا تھا۔
کیس کی سماعت کے موقع پر لوزیانا کی امیگریشن عدالت نے ٹرمپ انتظامیہ کے حق میں فیصلہ جاری کردیا، اپنے فیصلے میں جج کا کہنا ہے کہ میرے پاس امریکی وزیر خارجہ مارکو روبیو کے فیصلے کو ختم کرنے کا کوئی اختیار نہیں ہے۔
عدالتی فیصلہ میں کہا گیا ہے کہ محمود خلیل کو ملک شام جہاں وہ پیدا ہوئے ڈی پورٹ کیا جائے، اس کے علاوہ ان کو الجیریا جہاں کے وہ شہری ہیں وہاں بھی ڈی پورٹ کیا جاسکتا ہے۔
فیصلہ جاری ہونے کے بعد محمود خلیل کے وکلاء نے امیگریشن عدالت کے فیصلے کو چیلنج کرنے کا فیصلہ کیا ہے۔ طالب علم محمود خلیل اس فیصلے کیخلاف23اپریل تک اپیل دائر کرسکتے ہیں۔
مزید پڑھیں : امریکی عدالت میں محمود خلیل کی ملک بدری روکنے کو چیلنج کرنے کی درخواست مسترد
امریکی وزیرخارجہ کو 1952 کے امیگریشن ایکٹ کے تحت کسی بھی غیرملکی کو ملک بدر کرنے کا اختیار حاصل ہے، محمود خلیل کی ملک بدری سے متعلق ایک اور مقدمہ نیو جرسی کی عدالت میں زیر التوا ہے۔
