سی ٹی ڈی نے کراچی میں کارروائی کرتے ہوئے نجی بینک کی کیش وین لوٹنے والے مرکزی ملزم کو گرفتار کر لیا ہے۔
اے آر وائی نیوز کے مطابق کراچے کے علاقے دھوراجی بہادر آباد میں کامیاب کارروائی کرتے ہوئے نجی بینک کی کیش وین لوٹنے والے مرکزی ملزم کو گرفتار کر لیا ہے۔
اس حوالے سے انچارج سی ٹی ڈی چوہدری صفدر نے بتایا کہ کارروائی میں ملزم ایاز علی کو گرفتار کیا گیا ہے جو نجی کیش وین کمپنی میں سیکیورٹی انچارج تھا اور اس نے دوران تفتیش مزید اہم انکشافات کیے ہیں۔
سی ٹی ڈی کے مطابق ملزم نے 2021 میں جوڑیا بازار پر بینک کو کیش فراہم کرنے والی وین کو لوٹا تھا اور 50 لاکھ روپے لوٹ کر راولپنڈی فرار ہوگیا تھا۔
انچارج سی ٹی ڈی کا کہنا ہے کہ واردات کے بعد وہ اپنے رشتے داوں کے گھر روپوش تھا اور حال ہی میں کراچی واپس آیا تھا جسے ٹیکنیکل بنیاد پر گرفتار کیا گیا۔
سی ٹی ڈی کے مطابق گرفتار ملزم کو مزید قانونی کارروائی کیلیے پولیس کے حوالے کیا جا رہا ہے۔
