ممبئی: بھارتی شہری کو بالی ووڈ اداکار اجے دیوگن کی گاڑی روکنا مہنگا پڑ گیا۔
بھارتی میڈیا رپورٹ کے مطابق ریاست ممبئی میں فلم سٹی گیٹ کے قریب 28 سالہ بھارتی شہری رجدیپ سنگھ کو اجے دیوگن کی کار روکنے پر گرفتار کرلیا گیا۔
ممبئی پولیس کا کہنا ہے کہ اس شخص نے یہ جاننے کے لیے اجے دیوگن کی کار روکی کے انہوں نے کسانوں کی حمایت میں کیوں آواز نہیں اٹھائی۔
پولیس کے مطابق رجدیپ سنگھ شمالی مضافاتی علاقے سنتوش نگر کا رہائشی ہے اور ڈرائیور کی نوکری کرتا ہے۔
بھارتی میڈیا کے مطابق مذکورہ واقعہ صبح ساڑھے دس بجے کے قریب پیش آیا، رجدیپ سنگھ نے اجے دیوگن سے یہ پوچھنے کے لیے ان کی گاڑی روک لی کہ انہوں نے کسانوں کے حق میں آواز کیوں نہیں اٹھائی۔
بعدازاں اجے دیوگن کے باڈی گارڈ پردیپ اندراسین گوتم نے تھانے میں رجدیپ سنگھ کے خلاف درخواست دائر کی جس کے بعد پولیس نے رجدیپ سنگھ کو گرفتار کرلیا۔
پولیس نے رجدیپ سنگھ کو گرفتار کرکے اس کے خلاف آئی پی سی سیکشن 341 اور 504 کے تحت مقدمہ درج کرکے تحقیقات کا آغاز کردیا۔
واضح رہے کہ بھارت میں متنازع زرعی قوانین کے خلاف کسانوں کا احتجاج جاری ہے، کسانوں کا مطالبہ ہے کہ تین متنازع زرعی قوانین کو واپس لیا جائے۔
